Ousmane Dembele a ngaihtuahawm lo

Paris Saint-Germain chuan Ousmane Dembele dinhmun an ngaichang mek a, zanin dar 8:30-a Strasbourg nen Ligue 1 match an khelh hunah a inlan a rinawm rih lo.

Arsenal nen Champions League semifinal an khelh ṭumin Dembele hian goal awmchhun a khung, a hnuah hliam a tuar. Gunners an hmachhawn hnua training an neih lehna hmasa berah France international hi a inlan thei lo.

Luis Enrique enkawl PSG hian Ligue 1 nomawi an humhim chiang tawh a, hneh loh nei loa league match khelh zawh an tumna erawh an puitling thei tawh lo, an tan chuan UCL atana player dah ṭhat a sual tawh lo a ni.

Dembele chungchang sawiin Enrique chuan, "Hliam na tak a ni lo, hliam tenau mai chau niin kan hria. Ousmane hi inkhel leh nghal thei se tih chu kan duhthusam pawh a ni.

"Mahse, a inkhel thei lo a nih pawhin season tir lama ka lo sawi tawh ang khan team kan ni a, ṭha takin kan khel chhuak thei tho ang," tiin mimala innghat an nih loh thu a sawi bawk.

Ligue 1 nomawi an chawi tawh bakah UCL final lut turin dinhmun ṭha takah an ding mek a, French Cup final an lut tawh bawk. Spanish coach ṭha Enrique leh a naute hian season duhawm an hmang mek, duhthusama a hmawr bawk tur erawhin hmabak hlen chhuah tur an la nei thung.