A chung berah Mumbai Indians

IPL-ah Mumbai Indians-in bul ṭan ṭha tawk lo mah se season chawhnu lam an hmang ṭha a, table chung berah an awm leh tawh. Ningani zan khan Mumbai hian Rajasthan Royals chu 100 runs-in an chak.

Sawai Mansingh Stadium, Jaipur-a inkhelah Rajasthan Royals-in vawm hmasak an thlang a, opener Ryan Rickelton (61) leh Rohit Sharma (53) te hmangin dinhmun ṭhaah an indah. Suryakumar Yadav (48*) leh Hardik Pandya (48*) ten an thlawp ṭha bawk a, 217/2 runs an tlin.

Rajasthan batter-te erawhin Trent Boult (28/3), Karn Sharma (23/3) leh Jasprit Bumrah (15/2) te an ngam lo a, over 16.1 lekah 117 runs siamin an thi fai vek.

Zanin dar 7:30 hian Royal Challengers Bengaluru leh Chennai Super Kings te an inkhel ang a. March 4, Pathianni tlai dar 3:30-ah Kolkata Knight Riders leh Rajasthan Royals te an inkhel ang a, zan dar 7:30-ah Punjab Kings leh Lucknow Super Giants te an inkhel leh bawk ang.