Championship-ah Leeds United an champion

Season tharah Leeds United leh Burnley ten Premier League an khel dawn a, club pahnih hian Championship-ah point 100 ve ve an hmu - a tawpa champion zawk chu Leeds United an ni a, injury time-ah an champion!

Inrinni zan Championship inkhelah Burnley-in 3-1 in Millwall an hneh a, 2-1 a hma an hruai reng laiin, lehlamah an elpui Leeds United chuan 1-1 in Plymouth Argyle an inhnehtawkpui.

Hetiang hian inkhel tawp ta se, Burnley chu a champion zawk tur an ni. Mahse, hun pek belh minute khatnaah Burnley beiseina chu tihboin a awm. Leeds tan Manor Solomon chuan goal a khung a, 2-1 in an chak ta daih.

Burnley hian injury time-ah Millwall lakah goal an khung ve tho a, mahse, Leeds-in hnehna an chan avangin awmzia a nei phak ta lo - point 100 ve ve an hmu a, goal difference-a dinhmun ṭha zawk Leeds an champion.

Daniel Farke enkawl Leeds hian Plymouth khelmualah goal an chhuah hmasa hial a, Sam Byram chuan an lamah a tilut. Mahse, Wilfried Gnonto chuan si phurh sutin, Solomon chuan hun pek belhah chakna goal a khung zui ta a ni.

Burnley pawhin Millwall lakah goal an chhuah hmasa ve tho - Mihailo Ivanovic chuan playoff khelh beisei Millwall tan a khung hmasa a, Josh Brownhill leh Jaidon Anthony ten an chhanglet.

Minute 90 thleng chu champion tur angin Burnley an awm hman a, mahse, Leeds-in goal an khung leh tak si avangin, hun pek belha Burnley tana Brownhill goal khungin awmzia a nei phak lo.

Hetihlai hian Millwall erawh an tlawm avangin playoff khelh beiseina a bo nghal a, Sheffield United, Sunderland, Coventry City leh Bristol City ten EPL khel tura hmun ruak pakhat la awm chu playoff hmangin chinfel an tum ang.

Leeds laka tlawm Plymouth pawh League One lamah an relegate a, anni bakah hian club lar Cardiff City leh season hmasaa Premier League aṭanga relegate Luton Town te an tla bawk.