Manchester City leh Villa an chak

Premier League champion a chiang tawh a, Champions League khel tur inchuh boruak erawh a sang. Manchester City-in Wolves 1-0 in an hneh a, Aston Villa-in Fulham 1-0 thoin an hneh bawk.

Pep Guardiola hote hian match 35 aṭangin point 64 an hmu a, Europe inelna sang ber khel turin an dinhmun a ṭha leh tawh. City khingpui tur hi Southampton, Bournemouth leh Fulham te an la ni.

Villa erawh chak mah se pasarihnaah an awm mek a, hmabak a la harsa dawn. Chutihrualin Unai Emery hote hian point 60 an hmu a, pathumna Man City nena an inthlauhna hi point li chauh a ni. Villa hian Bournemouth, Tottenham leh Man United an la hmachhawn dawn.

KDB a vul

Man City-in Kevin de Bruyne chhuah tur thu an tihchian hnuah Belgian midfielder a che ṭha a, Inrinni zanah pawh goal awmchhun a khung. Etihad Stadium-ah City leh Wolves an inkhel tawk a, mikhual team-in ṭum hnih ngawt goal ngeina turah ngaih theihah goal an khung lo.

Mahse, minute 35-naah KDB-a'n Jeremy Doku hnen aṭanga a ball hmuh chu goal-ah a khung a, goal dang hmuh tur awm lo. Chutihrualin second half-ah Man United nena sawi zawm Matheus Cunha-a'n goal ban a pet per a, City an vannei. Point thum hmuh hi City tan chanchin lawmawm a tling a, kar liam ta khan player pawimawh pahnih Erling Haaland leh Rodri ten training an zawm leh tawh bawk.

Wolves hmachhawn zawhah De Bruyne chuan, "City tana la khel tlak ka ni, tih ka lantir. Helai hmuna ka tihtur hi ka ti chhunzawm zel ang," tiin a sawi a, Belgian midfielder hian a thusawi dikna khelmualah hmuhin a awm.

Beisei nei Villa

Aston Villa-in tun season khan Champions League khel tlak an nihzia an pholang a, mahse season thara UCL khel leh tur chuan Premier League-ah pangana china an awm ngai.

Villa Park-ah Youri Tielemans-a'n minute 12-naah John McGinn corner kick pet chu a tauh lut a, goal dang lut tawh loin Emery hote hi 1-0 in an chak.

Unai Emery chuan, "Europe khelh kan tum a, kan tan chuan kan chak hi a pawimawh hle. Champions League khelh hi kan duhthusam a ni a, khelh leh ngei kan duh. Kan khelh hmabakah theihtawp kan chhuah dawn," tiin a sawi.

Villa khelh hmabak Bournemouth hi season hmang ṭha an ni a, Spurs leh Man United te erawh che ṭha lo mah se club lian an ni a, Europa League final khel tur an ni bawk.