Mizo hlang TNT an chak

EverHome Pro Volleyball League 2025 khelh laiah Inrinni zan khan Thutak Nunpuitu Team chuan Hunthar chu 25-19, 25-18, 25-15 (3-0) in an hneh a, match zawnin an chesual duh lo.

PVL-ah TNT chauh hi Mizo player hlanga khel an ni a, an thiampuipa Vanlalṭanchhana chuan point 20 hlap chhuakin Kuriz Player of the Match atan thlan a ni. Zosangzuala (13 points), K. Zodingliana (8) leh Saidingpuia Sailo (7) ten an thlawp ṭha bawk.

An match hmasa zawkah chak lo mah se TNT an tho chhuak a, point thum hmuin team paruk inel zingah pahnihna dinhmun an luah mek. Hunthar erawh Anurag Rawat hoa khel ni mah se, match hnih an khelh tawhah chak ni hmel an la hmu lo.

Zirtawpni zan khan Khawbel chuan Sihphir chu 25-20, 25-21, 25-19 (3-0) in an lo hneh ve bawk a, kai thar team ni mah se Koawbel hi a nep lo, a zawna hnehna changin table hmahruaitu an ni mek, champion an sawi ri ngam ang.

Zanin hian a hmun ngai LPS Arena, Falkland Vengah khelh chhunzawm a ni leh dawn, tun hma lama lo champion tawh Anastasia Electric Veng leh team hmuhnawm Tuichangral te an inhmachhawn dawn a ni.