Mizo instructor hnuaiah D Licence Course zo

MFA buatsaihin AIFF D Certificate Coaching Course chu Saitualah April 28 - May 3, 2025 chhung khan neih a ni a, instructor hi R. Lalruatfela a ni.

Kolasib tlangval R-a chuan, "Mizo coach-te football hriat belh duhin an tuihal tak tak niin ka hria. Class room-ah zawhna zawh an uar a, practical class-ah pawh ring takin an ṭawng thei a, minti lawm khawp mai," tiin Vanglaini a hrilh.

Keifang Centenary Ground-a neih course-ah hian mi 25 an tel a, Mizoram football-a hriat hlawh Ricky Lallawmawma, Lalchhawnkima, Lalrinchhana Tochhawng leh Brandon VL Remdika te pawh an tel a ni.