Champions League atan Barca inbuatsaih

Barcelona coach Hansi Flick-a'n Champions League nomawi chawi a duh a, kartawp La Liga inkhelah rawlthar rual bul ṭantir chungin Real Valladolid a hmachhawn.

Barcelona hian khualmualah Segunda division lama tla tawh Valladolid hi 2-1 in an hneh a, chak turin senior player tho an mamawh - Valladolid tan hian Iván Sánchez chuan goal hmahruai khungin, bench aṭanga luhtir Raphinha leh Fermin Lopez ten Barca tan goal khungin an chakpui.

Catalan club hian hnehna an chan avangin La Liga table-a an hmahruaina an sawh nghet a, inrintawkna nen Thawhlehni zana Champions League an khelh tur an thlirlawk thei ang.

Hetihlai hian Atletico Madrid chuan Deportivo Alavés khelmualah hnehna an chang zo lo a, 0-0 in an inhnehtawk. Pahnihna Real Madrid chu nizan khan inlanin, he thu buatsaih a nih lai hian an result kan hre hman lo.

Hello UCL!

May 6, Thawhlehni zanah Barcelona-in UCL semifinal second leg khel turin Inter Milan an lenchilh dawn a, first leg-ah 3-3 a an inhnehtawk tawh bawk si avangin Barcelona tan hmabak a hautak hle.

Catalan club coach Hansi Flick-a'n hei hi hre rengin, player langsar rual a chawlh hahdamtir a, Inter nena an inkhela bul ṭan aṭang khan player pakua ngawt chu a siksawi.

Mahse, Flick-a leh Barca beisei angin thil a kal lo - minute rukna lekah Iván Sánchez chuan mualneitu team tan goal hmahruai a khung a, thla sarih zet hliam vanga a chawlh hnua si ban nghaktu Marc-André ter Stegen-a'n tihtheih a nei lo.

Barca an harh zawk a, inkhel an thunun chhunzawm. Catalan club tana a match hmasa ber kheltu, kum 19 mi Dani Rodríguez a inhliam zui a, minute 38-naah a thlak tura Lamine Yamal lut zuiin, Barca tlarhma an hmuhnawm sawt.

A tawpah Barca

Barcelona-in goal lut loin chawlhlawk an hmang a, mahse, an khelh dan thlirin, "Si phurh an sut ang em?" tih ai chuan, "Engtikah nge an sut ang?" tih chu zawhna zawk a ni a, second half-ah pawh inkhel an thunun chhunzawm.

Hetihrual hian Flick-a'n 'risk' lak reng a fuh lo tih hriain, second half ṭantirah Raphinha leh Frenkie de Jong a luhtir bawk a, German coach hian an hmabakah El Clasico a la awm tih a hai lo.

Raphinha-a'n hun a mamawh rei lo. Khelmual a luh aṭanga minute 10-na lekah si phurh sutna goal chu ṭha zetin a khung a, Brazilian forward hian tun season inelna hrang hrangah match 52 khelin goal 31 a khung ta a, assist vawi 25 a nei tel.

Barcelona an phur chhunzawm. Goal an khung aṭanga minute ruk hnuah Fermín López inlar ve lehin, chakna goal a khung - Valladolid tan Barca an ṭha hret a, Flick-a naute an chak.

Beiseina chu

Barcelona-in Valladolid khelmualah player ṭha engemawzat an hahdamtir a, harsatna liantham tawk loin hnehna an chang thei - Ter Stegen-a'n si ban a nghak leh ta a, Barca tan lawmna a ni.

Mahse, Flick chuan German keeper hi rinrawla neih leh nghal a tum lo a, Ter Stegen-a inhliam vanga an lakluh Wojciech Szczesny chu first choice a nih chhunzawm tur thu a sawi.

Barca hi an vanneih zan ni se, goal tam zawk khung thei tur an ni a, mahse, Hector Fort-a khung ngei tura lang chuan post a per a, Yamal-a goal khung tur chu goal line aṭangin an lo 'clear' hman bawk.

Hetihlai hian Barca player zingah Dani leh Gavi te hliam vangin lakchhuah an ngai a, Flick chuan, "Gavi dinhmun a ngaihtuahawm lo turah ka ngai a, amah chuan a ṭhat thu min hrilh. Mahse, kan nghah phawt a ngai ang," a ti a, Dani dinhmun a la sawichian theih loh bawk.