Kane leh Bayern champion hun a hla hret

Bayern Munich-in Leipzig-ah Bundesliga champion lawm an tum a, mualneitu RB Leipzig-in injury time-a Yussuf Poulsen hmangin an la chelh a, 3-3 in an inhnehtawk. Nizan khan Bayer Leverkusen-in SC Freiburg an tlawh a, Xabi Alonso hote hi an chak lo a nih chuan Bayern hi chhiarkawp dan thlapin an champion ang.

Red Bull Arena Leipzig-ah Benjamin Sesko (11') leh Lukas Klostermann (39') te hmangin Leipzig-in goal hnihin hma an hruai a, Bavarians-in second half-ah Eric Dier (62'), Michael Olise (63') leh Leroy Sane (83') te goal hmangin an lehthal.

Inrinni zan inkhelah hian Harry Kane chu hrem vangin a in lan thei lo a, entu zingah telin champion lawm tumin Leipzig-ah a zin. Mahse, injury time-ah pawh minute linaah Yossuf Poulsen-a'n siphurh a sut a, 3-3 in inkhel a tawp.

Bayern hian May 10, Inrinni zanah Borussia Monchengladbach an mikhual dawn a, Allianz Arena-ah ngei champion an lawm thei dawn. Vincent Kompany hote hian match hnuhnung ber chu May 17, Inrinni hian an khel dawn a, khual mualah Hoffenheim an hmachhawn ang.

Bavarians hi an khelh hmabak pahnihah chak lo ve ve pawh ni se, champion tho tura ngaih an ni tawh. Tunah hian Kompany hote hian point 76 na hmu mek a, Alonos hote hian an khelh hmabak an chak vek pawhin 76 tho an hmu dawn. Nizan inkhel chhiar tel loin goal difference 30 a ni a, Leverkusen tan Bayern phak ngaihna a awm tawh lo.

Season thara Bayern chhuahsan tur Thomas Muller chuan, "Kan champion tawhah ka ngai a, mahse tih tur a la awm," tiin inkhelh banah a sawi. Harry Kane leh Bayern hian Gladbach hneh ngei a, nomawi chawi an duh ang.