A chung berah Kohli telna Bengaluru

Indian Premier League-ah Inrinni zan khan Royal Challengers Bengaluru chuan Chennai Super Kings chu run hnihin an hneh a, table chung berah an awm. Tun season IPL knockout stage lut tur hriatthiam a har a, chutihrualin Virat Kohli telna RCB hian knockout stage an lut lo a nih chuan thil mak a tling ang.

M. Chinnaswamy Stadium-ah RCB tan opener pahnih Jacob Bethell (55) leh Virat Kohli (63) te an che ṭha a, Romario Shepherd-a'n (53) a tawp a khar ṭhat bawk avangin 213/5 runs an siam tling. Kohli telna team hi chak mai tura ngaih ni mah se CSK opener Ayush Mhatre-a'n ball 48 lekah 94 runs siam zui a, Ravindra Jadeja-a'n thi loin 77 runs a siam.

Over tawpah Chennai tan chak turin 15 runs siam a ngai a, MS Dhoni-a'n a tawp a khar thei ta lo. India captain hlui hian over tawp berah run khat chauh a siam zawhah a thi a, hemi hnu hian Chennai lamin beisei tur an la nei tho. Shivam Dube-a'n six rawn vaw nghalin RCB bowler Yash Dayal a 'no ball' bawk avangin ball khat lekah run sarih a siam nghal a, chak turin ball thumah run ruk a ngai - thil theih a ni.

Mahse, Yash Dayal-a'n ball thumah run khat zel chauh pein RCB-in Chennai lakah hnehna an chang. Zanin dar 7:30 hian Sunrisers Hyderabad leh Delhi Capitals te an inkhel ang.