Vawiin aṭangin CYMA Football

Tualchhung football ngaihhlut LBS Suzuki 22nd Inter Branch YMA Football Tournament 2025 chu vawiin aṭangin khelmual pali RG Stadium, 1st Bn MAP Ground, Chite Playground leh Muallungthu Ground-ah te khelh ṭan a ni dawn. Ground pali hi phullem phah vek a ni.

Ni hmasa ber aṭangin team ṭha an inlan nghal dawn a, champion rinkai zinga mi Armed Veng South-in vawiin chawhnu dar 2:30 hian RG Stadium-ah Vangtlang an hmachhawn dawn.

Team ṭhaa zinga tel pha Champhai Zotlang an inhnukdawk a, tun inelnaah Aizawl FC forward Lalbiakdika a inlan thei dawn lo. Hahdam zawkin Mamit Hmar Vengin second round an lut dawn tihna a ni ang.

Chite Veng Playground-ah mualneitu Chite Veng te an inkhel dawn a, anni hi ground ṭha an neih hnuah hma an sawn. Champion rinkai ni pha lo mah se team lian barakhaih thei zinga mi an ni.

Chite Veng Playground-ah tho hian All Mizoram Inter Village 2024 finalist Ramhlun North an inlan dawn a, an khingpui tur hi Aizawl FC striker Lalrinzuala telna New Serchhip Chhekhnai a ni.

CYMA Football-ah hian ticket lak a ni dawn a, inkhel en man hi Rs 20 a ni. Stage sang chinah Zonet-in an live dawn a, chutihrualin first round aṭangin a duh tan YouTube lama live phal vek a ni dawn.