Chak loh dan thiam United

Manchester United-in Premier League-ah chak dan an theihnghilh a, chak loh dan an thiam thung. Ruben Amorim-a hote hian Pathianni zan khan Brentford an tlawh a, 4-3 in an chak lo.

March 16, 2025 khan Man United hian relegate tur zinga mi Leicester City an hneh a, hemi hnu hian league-ah chak an nei tawh lo. Match hnuhnung parukah vawi li an chak lo a, vawi hnih an inhnehtawk.

Brentford Community Stadium-ah Mason Mount hmangin United-in khung hmasa mah se Luke Shaw-a'n an lamah a tihluh avangin Bees-in siphurh an sut. Mualneitu tan Kevin Schade-a'n goal hnih khung belhin Yoane Wissa-a'n a khung belh bawk.

Amorim-a hote hi 4-1 a mualpho thei dinhmuna an din hnuah Alejandro Garnacho leh Amad Diallo ten siphurh an sut ṭhen a, 'comeback' beiseina nei hial mah se goal dang an khung belh thei lo. Man United tan hian kum 17 leh ni 156 mi Chio Obi-a'n bul a ṭan a, club tana Premier League khel thei naupang ber a ni.

Man United hian league-ah result ṭha nei lo mah se Europe lamah erawh hneh loh an la tawng lo thung a, Amorim-a'n May 8, Ningani zana Athletic Bilbao nen semifinal second leg an khelh tur atan player a dah ṭha tih hriat a ṭha. United hian Europa League an champion chuan season tharah UCL an khel thei dawn a, hei vang hian Premier League an hlamchhiah tiin a sawi theih.