A tawpah Kane a champion ve ta!

Harry Kane chuan hun rei tak chhung a nghah tawh chu a nghak chhuak ta. England captain hi tunah chuan Bayern Munich tan Bundesliga champion a ni ta, a tan mellung pawimawh bik a ni.

Bayern Munich hian kar tawp inkhelah RB Leipzig chu 3-3 in an inhnehtawkpui a, an la champion mai lo. Mahse, Pathianni zanah champion lai Bayer Leverkusen chu Freiburg nen 2-2 in an inhnehtawk ve thung, an chunga awm Bavarians hi umphak theih an ni tawh lo.

Inrinni zan khan Bayern hian Leipzig hi hneh ni se la chuan, midang result ngaihchan tel ngai loin an champion nghal ang. Hemi ṭum hian Kane hi hrem vangin a inkhel thei lo a, mual sir aṭangin a ṭhiante inkhel a lo e a ni.

Kum 31 mi Kane hian tun kar tawpa Borussia Monchengladbach an mikhual hunah chuan a inkhel thei tawh dawn a, anmahni khelmual Allianz Arena-ah ngei champion lawm nan a inkhel thei dawn, goal nena lawm a châk khawp ang.

Tottenham striker hlui Kane hian mimal chawimawina hrang hrang a dawng tawh a, striker goal khung thei bik a ni. Mahse, nomawi a chawi mai theih loh avangin sawisel a hlawh ṭhin, tunah chuan kum 15 chhung a nghah tawh chu a nghak chhuak ta a ni.

Bayern Munich tan Bundesliga title 34-na a ni ta chiah, an champion theih nan Kane hian goal 24 khungin a thawh hlawk hle - season hmasa khan Leverkusen lakah title hloh mah se, kum khat hnuah an lalet.

German rama football inelna sang berah hian team 18 an awm a, league match khelh tur 34 an nei; tun season atan khelh hmabak pahnih la nei mah se Bayern Munich hi club dang tan umphak theih an ni tawh lo a ni.