Draper hnehin Ruud a champion

Casper Ruud chuan a vawi khat nan Masters 1000 title a la ta! Pathianni zana khelh zawh tak Madrid Open final hmuhnawm takah Norway tlangval hian Jack Draper chu 7-5, 3-6, 6-4 in a hneh.

Kum 26 mi Ruud hian clay court bikah a vawi 18 nan final a khel a, tawnhriat a nei tam tawh. Inelna hniam zawkah te chuan lo champion tawh ṭhin mah se, tun ṭum hi Grand Slam dawta inelna sanga a champion vawi khatna a nih avangin atan a hlu hle ang.

Seeded 14 ni chunga champion thei Ruud chuan, "Ka naupan lai aṭangin tennis inelna lianah hian ka la champion ve ang tiin ka ngaihtuah ṭhin. Jack khan tournament a khel ṭha em em a, ani ka hneh a nih chuan beisei phak baka ṭhain ka khel tihna a ni," a ti.

Ruud hian tun hmain Grand Slam final pawh vawi hnih a khel tawh, chung zingah chuan French Open final vawi hnih pawh a tel. May 25 aṭangin Roland Garros an khel dawn, clay court inelna lianah hian beisei a nei sang ang.