Curry hoin Warriors an tlang

Golden State Warriors chuan nimin zing khan Houston Rockets chu 103-89 in an hneh. Warriors hian NBA Western Conference first round playoff series chu 4-3 in an la.

Warriors hian a tir lamah chuan 3-1 in series hma an hruai thei a, tlang mai tura ngaih ni mah se a zawnin an chak lo; 3-3 a nih avangin tlang tur zawk a chiang lo a, nimin zing khan game 7 hmangin an chingfel.

Hun pawimawh laiah Stephen Curry a rawn ding chhuak, point 22 a neih zinga 14 chu quarter hnuhnung ber chhunga a neih niin rebound vawi 10 a la bawk a, a team ten an mamawh lai takin mamawh chhanna a nihzia a lantir leh ta a ni.

American point guard Curry chuan, "Regular season kan thlir chuan kan chunga mi an ni a, mahse thawhhona ṭha nen chuan hneh theih an nihzia a takin kan hmu," a ti. NBA regular season chinah kha chuan Rockets hi Western Conference-ah pahnihna an ni a, tuna an ngam loh Golden State hi pasarihna an ni thung.

Nimin zing khan Eastern Conference semifinal game 1 khelh ṭan a ni tawh bawk a, inkhel hmuhnawm takah Indiana Pacers chuan Cleveland Cavaliers chu 121-112 a hnehin best of seven series khelh turah 1-0 in hma an hruai.