Real tan Mbappe-a'n goal hnih khung

Champions League-a beisei tur nei tawh lo Real Madrid chuan La Liga lamah Barcelona an um chhunzawm ve zel a, Pathianni zan khan an mikhual Celta Vigo chu 3-2 a hnehin, league hmahruaitu Barcelona chu point liin an hnaih leh ta.

Real tan striker chhuanvawr Kylian Mbappe chuan a theihna pholangin goal hnih a khung a, French striker hian Real-a a season hmasa berah goal 35 a khung tling ta der a, match 51 khel tawhin, assist vawi li a nei tawh bawk.

Mbappe-a goal khung hmain, rawlthar ṭhangduang Arda Guler chuan goal hmahruai a khung a, Mbappe-a'n goal hnih hmangin a belhchhah. Hetihlai hian 3-0 a ni a, Real hi nuamsain an chak dawn niin a lang hman.

Mahse, Santiago Bernabeu-ah Celta-in mualpho an duh lo. Minute 69-naah Javi Rodriguez inlarin, hnai set sawtah a khung a, mikhual team hian beiseina an nei sang leh sawt.

Minute 76-na a ni a, Celta bawkin an khung nawn. Club legend Iago Aspas ball pek ṭha zet chu amah ang thoa bench aṭanga luhtir Williot Swedberg chuan goal-ah a chantir a, 3-2 a ni.

Mikhual team hian si phurh sut zawh theihna remchang pawh an nei a, mahse, an 'chance' neih an chhawr lo - Aspas-a hnathawh rah bawk sengin, Pablo Duran chuan khung belh theihna remchang a nei a, mahse, uiawm takin a chhawr lo.

Hun tawp thlengin goal dang a lut lo a, Real-in hnehna hlado an chham - May 11, Pathianni zanah Madrid khaw club hian El Clasico khel turin Barca an lenchilh zui dawn a, Hansi Flick-a naute hi an hneh a nih chuan an inkarah point khat chauh a awm tawh ang.