UCL hmun ruak inchuh boruak a sang

Serie A aṭanga Champions League khelh tum inum boruak a sang a, a sang zual pathumte an fal tawh laiin hmunruak dang la awm pakhat chu Juventus, Roma leh Lazio bakah Bologna ten na takin an inchuh mek.

Pathianni zan khan Juventus chu Bologna khelmualah an lenglut a, 1-1 in an inhnehtawk. Renato Dalla'Ara-a inkhelah, mikhual Old Lady lamin Khephren Thuram hmangin khung hmasa mah se Remo Freuler chuan sutin point an insem.

Igor Tudor-a naute hian match 35 aṭangin point 63 hmuin palina an ni mek. Mahse, khelh zat inangah an hnuaia mi Roma leh Lazio te nen an point a inzat a, pasarihna Bologna aia an sanna chu point khat chauh a ni bawk.

Old Lady manager Igor Tudor chuan, "Bologna hi khelh dan phung danglam tak nei an ni a, chuvangin ni dang ang lo deuhin player pawh kan inrem, team hrang hrang ten inkhelh harsa an tihna hmuna point hlawh chhuah hi a lawmawm.

"Season zawh hmain khelh hmabak pathum kan la nei, kan tan chuan chetsual a thiang tawh lo. Kan chesual zeuh a nih chuan team dangin min tlanpel nghal mai ang," tiin an tan final match pathum ang maia pawimawh a ni tih a sawi.

Juventus hian an match lehpekah chuan an elpui Laizo an tlawh dawn, palina nih inchuh an nih avangin boruak a sang dawn - Laizo hnuah Udinese leh tlak hlau Venezia te an tum leh bawk ang.

Pathianni zan inkhel dangah AS Roma chuan Fiorentina chu 1-0 in an hneh ve thung a, goal awmchhun hi Artem Dovbyk-a'n chawlhlawk dawna a tauhluh a ni a, an mikhual laka point thum hmuh nan a tawk.

Roma manager Claudio Ranieri chuan, "Football hi chuan chona nasa tak hi a kengtel a, kei chuan hetiang taka boruak sang leh hautak hi nuam ka ti zawk ṭhin, chuvangin a tawp lam match pathum pawh hian min ti phur hle," tiin a sawi.

An hmabakah Roma hian an chunga mi Atalanta leh AC Milan bakah Torino te an la khel leh dawn, match awlsam a awm lo lang - inkhel hautak pathum an hmabak tihna a ni.

Table chung lamah champion lai Inter Milan chuan Napoli chu point thumin an phak lo mek a, European league lian ho zingah Serie A hi season tawp lama boruak sang leh lian an ni chho mek a ni.