Silly Point : Nipui leh Spinner

Zawlnei nih vang pawh ni loin tawnhriat leh lua samṭuak lo pung ve zel hian, he leilung inher dan kalphung tur lo hriat lawk theih chinna hi a lo pai ve hrim hrim a nih hmel.

April thla tir vela tournament a rei deuh hnuah spinner-te an pawimawh chhoh dan tur kan lo thailan lawk chu a takin a dik chho ve zel ni te pawhin a lang.

Lung min lentu ṭhal romei

Kumin India thal a na a, fur chu la ni miah lo mah se pre-monsoon (April & May) thla, a bik takin April-ah ruahtui a tlem a. Khelmual a ro a, pitch a ro tih a chiang.

Eng ang pawhin curator-ten tui pe hnemin, pitch te han roll-in, hnim te han ṭo tir ṭhin mah se, khuarel khaw ro (dry season) in a nghawng tho tho tih a chiang a. Chutiang ang pitch ro takah chuan spinner-0ten an duhtawkin ball an ṭhuai vir thei ta ṭhin a ni.

Chik zawkin

A environmental thil chu dah ṭha ta i la, kumin hian spinner tinte hian an raldo tur batsman-te an lo zir chiang nasa tih a hriat a, spinner te hi chu ball a 'full' lam deuh hleka vawm tura inzirtir leh cricket kalphung deuh pawh a ni.

Middle overs ( 7-15 inkar) ah kumin hian spinner te an hlauhawm lehzual a. Wicket 171 lai mai belkhawmin an la thei a, nikum IPL aiin over 44 zetin hemi hunlai hian spinner-ten an vawm hnem tawh zawk. Fast bowler-ten wicket 106 chiah an la thung. Tactic leh technique a inher danglam zel kan tih angin, thil thar a lo piang ve zel a nih hi maw.

Spinner-ten an vawm tawi

Kumin hian spinner tin deuh thawin an length hi an vawm tawi deuh fur a. Tun hma angin batter tam zawkin an ke leh footwork an hman tam loh vang leh step out shot khel an tlem vang a ni.

Hei hian a letling zawngin spinner-te a pui a, ball vuak sual, six hlap tuma thleng zo chiah si lo, fielder te lo man theih tawk 'missed timed' shot a titam tih a chiang reng. Uncapped player Vignesh Puthur leh Vipraj Nigam te kumin an rawn hlauhawmna em em chhan pakhat pawh hi a ni.

Table chung spinner

Round 14 inkhel tura round 11 an khel ta fur a. Team pathum Rajasthan Royals, Sunrisers Hyderabad leh Chennai Super Kings ten beisei tur an nei tawh lo. Team pasarih Royal Challengers Bengaluru, Punjab Kings, Mumbai Indians, Gujarat Titans, Delhi Capitals, Kolkata Knight Riders leh Lucknow Super Giants ten hmun ruak pali an inchuh ang.

Khelmual chhunga spinner-te an pawimawh ang bawkin table pawh hi a ni round tawpna thleng an in 'spin' kual dawn ni chek tur a ni. A hmuhnawm chho zel dawn e.