A zawna vawi thum chak thei Oscar Piastri

Formula 1 season hman laiah Oscar Piastri a cheṭha fal a, tun hnaiah a zawnin intlansiak pathumah hnehna changin driver championship hmahruaitu a nihna a sawhnghet chhunzawm zel.

Pathianni zana tlan zawh tak Miami Grand Prix-ah Piastri hi a chungnung ber a, amah hnaih bertu pawh Piastri anga McLaren car khalhtu Lando Norris tho a ni a, an team tan season duhawm a ni chhunzawm.

Australian driver Piastri hian Miami hma hian Bahrain GP leh Saudi Arabia GP lamah te hnehna a lo chang tawh bawk a, champion lai Max Verstappen tan pawh a nomawi humhim tur chuan thapui thawh a ngai tih a chiang ta hle.

McLaren duhlai Piastri chuan, "Kum hnih liamta kha chiang takin ka la hrereng mai, he hmunah ngei hian McLaren car khalhin intlansiak kan hmachhawn a, khami ṭum khan kan team kha kan tlan muang ber.

"Hun a in her hret a, tunah chuan team dang hmaah McLaren chu second 30 chuangin kan awm thei ta," tiin a sawi. McLaren driver pahnih hnungah George Russell chu a thleng a, second 37.644 in a hmaa mi te a umphak lo.

Champion lai Verstappen chu palinaah a thleng. Red Bull driver hian kuminah vawi khat chiah chak ni hmel a la hmu a, driver championship lamah pawh pathumna ni mekin a chungah Mclaren driver pahnih Piastri leh Norris te an awm.

Kum 27 mi Verstappen chuan, "Tlan chhinna kan neih hnu khan ka sawi lawk tawh a, kei leh ka team chuan kan theih ang tawka chak leh sangin inelna kan hmachhawn. Mahse, keini aia tlan chak zawk an awm tlat si.

"Kan motor ke (tyre) thlan kha a fuh tawk lo deuh niin a lang. A nihna takah chuan dawhsan a lawn phak lo nih hi chu engtik lai pawhin a hrehawm, vawi leh khatah a insiamṭhat nghal vek theih loh a nih pawhin midang elphak kan nih leh thuai a ngai," tiin a sawi.

Khawvela car intlansiakna sang ber Formula 1 hi May 18, Pathianni zan dar 6:30 hian Autodromo Enzo e Dino Ferrari-ah Emilia Romagna Grand Prix an tlan leh ang a, kumin atana intlansiak pasarihna tur a ni ang.