Rosberg-a'n nomawi hnaih zel

Nimina tlan zawh tak Formula 1 Japanese Grand Prix-ah Nico Rosberg chuan hnehna a chang. Mercedes driver hian nomawi kawl mektu leh a teammate ni bawk Lewis Hamilton chu championship-ah point 33 zetin a tlan san ta.

Suzuka tlan kawnga intlan-siakah Rosberg hian pole position aṭanga bul ṭanin a tawp thlengin hmahruaitu a ni. Pahnihna aṭanga bulṭantu Lewis Hamilton-a'n bul a
ṭan ṭhat loh avangin Max Verstappen-a'n a tlan pel a, Red Bull driver rawlthar duhawm Verstappen hi pahnihnaah thlengin Rosberg a phak lohna chu 4.9 seconds a ni.

Kum 31-a upa Rosberg hian intlansiak hnuhnung pangaah vawi li hnehna a chang thei a, point 313 hmuin intlansiak hmabak pali la awmah point hmuh belh tawh lo pawh ni se driver championship-ah pahnihna aia hniam a ni thei tawh lo. Suzuka tlan kawngah bik hian a vawi khat chakna a ni a, tun season-ah vawi kua hnehna chang tawhin ṭum 12 zet podium-ah a lawn ta.

German driver Rosberg chuan, "Kartawp nuam leh hlimawm tak chu a ni chiang ngei mai. Hnehna ka chan avangin ka lawm a, ka lawmna ti zualtu zawk chu kan team kan che ṭha hi a ni," tiin mimal hlawhtlinna bakah constructor championship a ngaih pawimawh thu a sawi.

Hamilton chuan, "Team ṭha leh ropui tak zinga ka tel ve thei hi ka lawm a, vawiin khan ka theih tawp ka chhuah a, ka thlen chinah khan ka lawm. Season a la tawp lo a, theih tawp ka chhuah chhunzawm dawn, eng nge lo thleng kan hre zel ang," tiin a nomawi hloh mai a tum lo hle.

Mercedes an chungnung

Kumin hian Formula 1-ah team 11 an inel a, intlansiak 17 an neih tawh aṭangin Mercedes chuan cons-tructors' championship-ah point 593 hmuin pahnihna Red Bull (385) tan lehpelh theih an ni tawh lo. Tun season-ah hian Mercedes driver Rosberg leh Hamilton tih lohah chuan Red Bull driver pahnih Verstappen leh Daniel Ricciardo te chiah hnehna chang thei an awm.

Japanese Grand Prix Results

# Driver Team

1 Rosberg Mercedes

2 Verstappen Red Bull

3 Hamilton Mercedes

4 Vettel Ferrari

5 Raikkonen Ferrari

6 Ricciardo Red Bull

7 Perez Force India

8 Hulkenberg Force India

9 Massa Williams

10 Bottas Williams