Rafael Nadal a tla leh ta

Grand Slam vawi 14 champion tawh Rafael Nadal-a'n beisei angin season a hmang ṭha thei lo. China Open-ah Nadal hi set hloh miah loin quarterfinal lut mah se Grigor Dimitrov lakah erawh set la miah loin Zirtawpni khan 6-2, 6-4 in a chak lo.

Kum 30-a upa Nadal hi a banrek na vang leh damlohna vangin kuminah a inkhel tam tawk lo a, ATP title pahnih chiah lain a hlawhtlin tam loh chhan erawh a khelh ṭhat tawk loh vang a ni thung.

Nadal chuan, "Inkhel pakhatah ka service vawi nga ngawt ka hum zo lo a nih chuan chak loh pui ngei tham a tling. Dimitrov khan hnehna changtu nih a phu zawk a, nomawi chawi tur pawhin ka duhsakna ka hlan e," tiin a sawi.

China Open-ah hian seeded pakhatna Andy Murray chuan darkar khat leh a chanve chhungin 6-2, 6-3 a David Ferrer hnehin a vawi khat nan Beijing-ah final a lut. Britain tlangval Murray hian kuminah ATP Tour-ah final vawi kua a lut tawh a, Wimbledon leh Rio Olympic nomawi a chawi tawh.

Semifinal leh lamah Milos Raonic leh Nadal hnehtu Dimitrov te hi inhmachhawn tur an ni a, Wimbledon finalist Raonic hi ke rek na vangin a inhnukdawk thung. Nizan khan Murray leh Dimitrov ten final khelin result kan hre hman lo.