Zanin dar 12:15-ah Netherlands vs France

Netherlands-in 2014 FIFA World Cup semifinal an thleng a, Euro 2016-ah erawh an inpetling zo lo. France erawh Euro 2016 thlengtu niin game hmuhnawm tak an khel a, zanin dar 12:15 hian Europe football thiam ram pahnih hi Amsterdam-ah an inhmachhawn ang.

4-1 ve ve

FIFA World Cup Qualifier-ah France leh Netherlands hi Group A-ah awmin an match hmasa berah point khat ve ve chauh an hlawh chhuak a, vawi hnih inlanaah erawh Les Bleus-in Bulgaria 4-1 in an sawp a, hetiang zat bawk hian Oranje-in Belarus an sawp bawk.

Stade de France-ah Bulga-ria-in minute 6-na lekah Mihail Aleksandrov penalty hmangin hma hruai mah se mualneitu France-in Kevin Gameiro, Dimitri Payet leh Antoine Griezmann te hmangin first half-ah an chhang let nghal a, Atletico Madrid forward Gameiro-a'n second half-ah goal khat dang a khung belh leh bawk.

Danny Blind-a kaihhruaina hnuaiah Netherlands-in lawmna tur an nei ve ta a, match hmasa bera France chelhtu Belarus sawp hi result ṭha a ni. Oranje tan FC Spartak Moscow winger Quincy Promes chuan inkhel
ṭan aṭanga minute 31 chhungin goal hnih a khung hman a, Belarus-in Aleksey Rios hmangin beiseina nei mah se Netherlands tan Ajax midfielder Davy Klaassen leh Tottenham forward Vincent Janssen ten goal khat ve ve an khung belh.

Netherlands boss Danny Blind chuan, "Belarus kan khelh danah lawmna tur tam tak awm mah se minute 25 chhung vel kha awmze nei miah loa kan khelh avangin lawm a kim lo. France anga team ṭha lakah chuan khatiang anga khelh kha a thiang tawh lo," tiin a sawi.

France manager Didier Des-champs chuan, "Bul ṭan ṭha lo mah ila kan insiamrem hnuah chuan harsatna kan nei tawh lo. Gameiro leh Griezmann te kha Atletico tana khel ve ve an nih avangin mual chhungah an khelhdan an inhrechiang a, kan tan malsawmna a ni. Netherlands kan pan hunah pawh kan tum kan thlak dawn lo, point thum hlawhchhuah tumin kan zin ang," tiin point khata a lungawi loh tur thu a sawi.

Manchester City defender Bacary Sagna chu malpui hliam vangin first half-ah lakchhuah a ni a, Netherlands a hmachhawn theih leh theih loh tur la chiang lo.

Champion lai nge nge

Hamburg-ah FIFA World Cup champion lai Germany-in Group C-a an elpui ber tura ngaih Czech Republic chu 3-0 in an sawp. Die Mannschaft tan Euro 2016-a goal khat pawh khung lo Thomas Muller-a'n goal hnih a khung bakah Toni Kroos-a'n goal khat a khung ve bawk.

German national team hian World Cup qualifying-ah match 25 chhung chu hneh loh an tawng tawh lo a, Bayern Munich forward Muller-a'n ram tan vawi 80 inlanah goal 36 a khung ta bawk.