Messi faktu Edgardo Bauza

Argentina coach Edgardo Bauza chuan Lionel Messi chuan inkhelh mai bakah football chungchang a hriat thuk em em thu a sawi.

Copa America Centenario final-ah Argentina hian Chile an hneh lo a, hemi hnu hian Messi-a'n ram tana inkhelh a chawlhsan thu a sawi. Coach thar Bauza hian a hna hmasaah Messi chu a rilru inlam lettir turin a kawm a, a hlawhtling. September 1 khan Barcelona star hian Uruguay hmachhawnin goal awmchhun a khung.

Kum 58-a upa Bauza chuan, "Leo hian inkhelh a thiam a, chutih rualin a teammate leh technical team thlengin a hre chiang em em a, football-ah chuan engkim a hria a ni. Ka ngaihdan chuan khelmual chhunga hotu ni tur chuan midangte hrethiam leh hmu thiamtu nih a ngai a, ani hi chuan ka beisei phak aia sangin a hrechiang zawk," a ti.

Tun dinhmunah chuan Messi hi ṭhâl na vangin a chawl mek a, a tel loin kar hmasa khan Argentina hi Peru nen 2-2 in an inhnehtawk. Nilaini hian World Cup Qualifying an khelh chunzawm leh dawn a, zing dar 5:00-ah table-a parukna Paraguay an mikhual ang.