Jerry inlan zanah NorthEast chak zo lo

Chanmari tlangval Jerry Mawihmingthanga chu NorthEast United tan second half-ah tlan lutin a match hmasa ber khel mah se Highlanders a chhan chhuak zo lo a, Mumbai City khelmualah Diego Forlan penalty vangin 1-0 in an chak lo.

NorthEast United-in vawi hnih a zawna chak hmel an hmuh hnuah Mumbai City an lenchilh a, first half-ah team pahnihin goal an khung loh hnuah Highlanders defender Reagan Singh chuan Pronay Halder titluin penalty a chawi a, Atletico Madrid striker hlui Forlan-a'n harsatna nei loin a khung.

Mumbai City tan ṭum dang ang bawkin Lalhmangaihsanga Ralte chuan inkhel bul a ṭan a, North Mualcheng defender hi Mumbai tlarhnungah player pawimawh a ni. David Lalrinmuana'n khelhna hmun a la chang thei lo a, NorthEast lamah Lallianzuala Chhangte leh Lalrempuia Fanai te chu bench lamah an hun an la hmang zel bawk.

Inrinni zan inkhel-ah Pune City chuan khualmualah FC Goa chu 2-1 in an hneh bawk a, Pune tana Arata Izumi goal hmahruai khung chu Goa tan Rafael Coelho-a'n sut mah se minute 90-naah Senegal forward Momar Ndoye chuan mikhual team tan khung lehin Pune hi chungnung zawkah an ṭang ta a ni.