England chak mah se lawm a kim lo

Gareth Southgate enkawlna hnuaia an match hmasa berah England-in Malta 2-0 in hneh mah se Wembley Stadium-a England fan-te lawm a kim lo a, inkhelh zawhah captain Wayne Rooney chu fans ṭhenkhatin an au el hial.

Minute 29-naah England goal hmasa zawk hi a lut a, Liverpool striker Daniel Sturridge chuan club lama an captain Jordan Henderson ball siamsak chu striker class sang a ni tih pholan nan a tauh lut. Minute 38-naah rawlthar duhawm Dele Alli chuan England goal hnihna a khung a, FIFA ranking-a 176-na Malta lakah England-in goal an khung belh tawh lo.

Malta tan goalkeeper Andrew Hogg chu player langsar ber a ni a, kum 31-a upa keeper hian Alli, Wayne Rooney, Theo Walcott leh England tana a match hmasa ber kheltu Jesse Lingard te goal khung tur chu ṭha takin a dansak.

Engtinnge Rooney?

Jose Mourinho-a'n season ṭan hmain Rooney chhan viau mah se Manchester United-a a captain hi a ring ngam meuh tawh lo a, England tan pawh Rooney a 'vul' thei chuang lo. October 24-a kum 31 tling tawh mai tur striker hi Euro 2016-ah khan Roy Hodgson chuan midfielder atan a chhawr a, Gareth Southgate-a hnuaiah pawh a danglam chuang lo. Chhan reng ngai striker hi a rintlak meuh em? tih chu zawh-na awm thei a ni.

Rooney hian goal shot vawi hnih nei mah se Malta goalkeeper tan buaina tham a ni lo a, midfielder ni chunga ball vawi 177 lai khawih siin Malta penalty area-ah vawi khatmah ball khawih a nei lo! England player zinga Malta ball chan lai chhuhsak ngun ber chu Rooney niin vawi 14 a chhuhsak a, a ball chan lai vawi 25 lai hlohin England player zinga ball hloh ngun ber a ni bawk!

England tan vawi 117 inlana goal 53 khung tawh striker hi ṭul loah Malta captain Andrei Schembri lakah a foul bawk a, referee-in card a phawrh loh avangin a vannei hle.

Southgate thukhawchang

England manager lailawk Gareth Southgate chuan, "First half-ah khan kan khel ṭha takzet a, goal hnih aia tam zawk goal khung thei kan ni. Malta goalkeeper a che ṭha a, vawi tam tak min dang chat a ni. Ni 10 kal taa he team dinhmun kha thlir ula, zanin kan result vang hian lawm tur kan ni," a ti.

Southgate chuan England tana a match hmasa ber kheltu Lingard fak nghalin, "Lingard-a'n ram tana a match hmasa ber a khel a, a khel ṭha takzet a ni. Player hmuhnawm tak a ni a, Wembley-ah hian Manchester United tan goal hnih a lo khung tawh avangin harsatna nei miah loin a khel a ni," tiin a fak.

England-in goal tam zawk khung thei an ni a, FIFA ranking-a 176-na Malta laka an chak danah fan-te an lungawi lo. Mahse, Southgate chuan, "Fan-te lawm nan goal li emaw goal nga tala chak chu ka duh ngei a, mah se a harsa a ni. Malta hian Croatia leh Italy an hmachhawn ṭumin goal khat chiahin an lo tlawm tawh bawk a, an goalkeeper kha a ṭhat em avangin kan beisei zat kan khung lo a ni," tiin a insawifiah.

Southgate hma hun

England manager South-gate-a'n Malta an hmachhawn hmain a player-te chu rilru huaisen leh paukhauh pu tura a duh thu a sawi a, an team hmachhawn hmasak ber hi Malta an nih miau avangin Southagte-a team enkawl danah buk lung khai a la harsa hle.

England hian tun karah Slovenia chu khualmualah an lenchilh lehnghal dawn a, Under 21 coach Southgate-a tana fiahna tak tak chu Slovenia lakah hian inṭan tura ngaih a ni. November 11-ah Scotland an mikhual ang a, Spain nen friendly match an khel bawk ang - Southgate hian result ṭha a hlawh chhuak a nih chuan England coach tura a ngheta lak a nih rin a ni.

Malta lakah left-back Ryan Bertrand chu hliam vangin lakchhuah a ni a, Southampton defender hmun ruakah hian Arsenal defender Kieran Gibbs koh a ni. Kum 27-a upa defender hian England tan match 10 a khel ve tawh.

Inkhel chhehvel

• England hian qualifier match an hmachhawn hnuhnung 14-ah hnehna an la chang vek a, vawi 31 an khelh tawhah vawi 24 hnehna changin vawi sarih an khingpui an inhnehtawkpui.

• England-in qualifier match an khelh hnuhnung parukah goal chhuah an nei lo.

• Daniel Sturridge-a'n goal a khung chiah khan England tan May, 2014 hnua Wembley-a goal a khung leh hmasak ber a ni.

• Jordan Henderson chu player langsar ber a ni a, ball vawi 187 khawih fuhin vawi 165 pass dik a nei - Malta team pumpui in pass dik zat chu vawi 160 a ni!