CAS thutlukna a ngai tawh ang - IOC

International Olympic Committee (IOC) chuan ruahman-na thar siamin infiammi zingah damdawi hman phal loh chungchanga fihlim lo an awm a nih chuan an laka hremna lekkawh turin Court of Arbitration (CAS) thutlukna a ngai tawh dawn.

Kalphung awmsa ang chuan infiamna peng hrang hranga thuneituten an hnuaia dan bawh-chhia an awm a nih chuan hremna an lekkawh mai
ṭhin. World Anti-Doping Agency (WADA)-in dan an bawhchhia tih a hmuhchhuah zinga infiammi lungawi loten infiamna lama thubuai ngaihtuahtu sang ber IOC hnenah an thubuai ngaihtuah
ṭha turin an thlen leh ṭhin a, hei hian buaina chinfel aiin a ti khirh khan kual zawk niin a lang.

Tun hnaia kan hriat lar tak pakhat chu Maria Sharapova a ni. Russian star hi meldonium a hmang tih hmuhchhuah a nih avangin International Tennis Federation chuan kum hnih chhung inkhel thei lo turin a hrem. Mahse, hrem a nihna a khin let hnuah CAS chuan thla 15 chhung atan an tih tawi sak leh.

Rio Olympic-ah pawh khan WADA leh infiamna peng ṭhenkhata thuneitu lam chuan Russia kha kawng engkima an inlan loh an duh laiin IOC chuan Russian athlete 200 chuang zet chu dan leh hrai an zam zawm famkim thei an nih avangin Olympic-ah an inlan a phak sak thung.

Inrinni khan Lausanne, Geneva-ah IOC summit neih a ni a, he hunah hian CAS chu infiammi hrem leh hrem loh chungchanga thutlukna siamtu an nih theih dan tur kawng hi an sawiho a, hei bakah hian WADA chu tun hma zawng aia chak, ṭha leh langtlang zawka a kal zel theih nan thuam chak nise an ti bawk.

IOC President Thomas Bach chuan, "Langtlang, ṭha leh chang-tlung zawk a nih theih nan WADA pawh tun hma aiin thuam
ṭhat a ni ang," a ti. Bach sawi dan chuan WADA annual budget hi pound maktaduai 21.7 vela tih san tur a ni ang.

November 19-20 hian Glasgow, Scotland-ah WADA hian meeting an nei dawn a, he hunah hian an ruahmanna tharte chu an sawiho ang. WADA president Craig Reedie chuan puihna leh thuam chakna an dawng tur chu a lawm thu a sawi nghal a, "Hetiang thu a awm hi ka lawm a, dik takin tun hma aia chakin kan kal zel thei dawn tihna a ni," a ti.