Swansea leh Giggs inbe hman

Swansea-in manager Francesco Guidolin thlak nan Bob Bradley an lalut a, Welsh club hian American coach an lak hma hian an ram legend Ryan Giggs an bia. Manchester United player hlui Giggs hian Swansea a hnawl chhan chu an tum a hniam deuh vang niin a sawi.

Kum 42-a upa Giggs chuan, "Swansea hian telephone kaltlangin min bia a, vawi tam kan inhmu bawk. A tawpah erawh football chungchanga kan thlir dan a inmil lo a, an ruahmanna siam danin ka suangtuahna a pha lo a ni. Hei vang hian kan inrem thei ta lo," tiin Swans a enkawl loh chhan a sawi.

Welsh manager Giggs hian United-in David Moyes an ban hnuah ma-nager hna a thawk ve zawk tawh a, hemi hnu hian Louis van Gaal-a hnuaiah assistant manager hna thawk lehin Red Devils hotuten amah aiin club enkawl turin Jose Mourinho an thlang.

Swansea-in Giggs bakah hian Derby County manager hlui Paul Cle-ment leh Villarreal coach hlui Marcelino te an be hman bawk. Tunah hian Swans hi Premier League-ah 17-na an ni mek a, season ṭan nia an chak bak hnehna an chang leh tawh lo. Coach thar Bradley hoin Welsh club hian October 15, Inrinni zan khian Emirates Stadium-ah Arsenal an tlawh ang.