Italy leh Spain chak
Inkhel hriatthiam har tak a ni a, kan phu aia tam point kan hlawh chhuakah ka ngai a, chutihrualin kan rilru leh thinlung zawng zawngin kan khel a ni
- Italy captain Gigi Buffon
Ram tana ka goal hmasa ber ka khung thei kha ka lawm. Hun engemaw tichhung kha chu kan hlauthawng a, amaherawhchu Spain kan hmachhawn ṭum ang thoin Italy danglamna (huaisenna) hun tawp lamah kan lantir nawn leh a ni
- Torino striker Belotti
Spain-in FIFA World Cup qualifier Group G hmahruaitu ni turin Chelsea striker Diego Costa leh Manchester City forward Nolito te goal hmangin Albania 2-0 in an hneh. La Roja point hmuh zat point 7 hmu turin Italy-in khualmualah Macedonia chu Ciro Immobile goal hmangin an hneh hram.
Goal khung thiam Costa
Pathianni zanah Spain-in an mikhualna hmun Loro Borici Stadium, Albania-ah goal khung an harsat a, first half-ah goal a lut lo. Minute 54-naah Albanian defender tihsual hmang ṭang-kaiin Diego Costa-a'n goal hmahruai a khung a, Nolito-a'n minute 62-naah goal hnihna a khung leh bawk.
La Roja boss Julen Lopetegui-a'n Italy an draw hnuah chak ngei a duh avangin tlarhnungah player pathum chiah a hmang a, inhliam Jordi Alba aiah Arsenal defender Nacho Monreal chu inkhel bul ṭantir a ni bawk.
Spain tan Premier League player an khel ṭha a, Costa goal khung hi Manchester City midfielder David Silva siam sak niin Nolito goal khung hi Gunners defender Monreal siam sak a ni thung.
Manchester City forward Nolito chuan, "Player 11 tawpin goal venhim an tum avangin inkhelh a harsa hle a ni. Albania hi team ṭha tak an ni a, player-te'n an game khelh dan hmang an hriatchian bawk avangin tawh an khirh sawt bawk. Spain kan nih avangin kan goal khung tur dan hi ram dang tum dan a ni a, chuvangin kan thiamna leh khelh danah rinna kan nghah ngam a
ṭul a ni," tiin a sawi.
Azzurri tan Immobile
Italy leh Spain an inhnehtawk ṭumin Graziano Pelle-a'n thlak a nih hnuah coach Giampiero Ventura a chibai loh avangin Southampton striker hlui hi thawn haw a ni.
Azzurri boss Ventura hian Spain an khelh ṭum aṭangin player paruk ngawt a tidanglam a, Torino striker Andrea Belotti chuan a vawi khat nan ram tan inkhel bul a ṭan.
Italy-in Torino striker Belotti hmangin minute 24-naah goal khung nghal mah se FIFA ranking-a 103-na Macedonia-in Palermo striker Ilija Nestorovski (57') leh Ferhan Hasani (59') hmangin an chhanglet.
Azzurri keeper Gianluigi Buffon-a'n goal ngei tura ngaih a dan hnuah Italy tan Ciro Immobile a inlar a, Lazio forward hian minute 72-naa an siphurh a sut hnuah injury time-ah chakna goal a khung.
Wales tan point khat
Gareth Bale-a tauh luh hmangin Wales-in FIFA ranking-a 137-na ni mek Georgia lakah minute 10-naah hma hruai mah se an khelh ṭhat loh an tuar a, minute 57-naa Tornike Okriashvili-a'n an siphurh a sut hnuah mualneitu lamin goal an khung belh thei tawh lo.
FIFA World Cup Qualifier-ah Wales-in match thum khel tawhin point nga an hlawh chhuak tawh a, Group D-ah pathumna an ni mek. Inkhel dangah Republic of Ireland-in Southampton forward Shane Long goal khat leh West Brom midfielder James McClean te goal hnih hmangin Moldova 3-1 in an hneh a, Serbia-in an mualah 3-2 in Austria an hneh hram bawk. Group hmahruaitu Serbia tan hian Saints midfielder Dusan Tadic-a'n goal khat a khung bakah Newcastle United forward Aleksandar Mitrovic goal hnih khung tur a siam sak bawk.
Euro 2016 semifinalist Wales hian 2018 FIFA World Cup qualifier match thum khelh tawhah hneh loh la tawng lo mah se point kua hmuh theih tura point nga chauh an la hmuh avangin bul an ṭan ṭhaah a ngaih theih loh. Chris Coleman-a hoten hian kum 1958 hnuah World Cup khelh leh ngei an tum a, an hmabak erawh a harsa dawn.
Wales coach Chris Coleman chuan, "Mi tam tak chuan point hnih kan hlohah an ngai a, thlirna dang aṭang chuan point kan hmuh avangin kan vanneiah a ngaih theih bawk. Bul kan ṭan ṭha a, amaherawhchu khelmual chhungah kan ngaih a ṭhat hma lutuk avangin hremin kan awm ta a ni," tiin inkhel chungchang a sawi.
Georgia an draw hma hian Wales-in Austria lakah point khat chiah an hlawh chhuak tawh bawk. Kum 46-a upa Coleman chuan sawi chhunzawmin, "Kan result-ah kan lunghnur hle a ni. Ni li chhunga match hnih khelh chu a harsa a ni," tiin a sawi.
Wales hian November 12 khian group hmahruaitu Serbia an mikhual ang.
Inkhel leh a chhehvel
Kosovo tan la harsa : FIFA member thar Kosovo-in qualifier-a an match hmasa berah Finland draw mah se ni li chhung lekin goal kua an chhuah. Croatia laka 6-0 zeta an tlawm hnuah Kosovo hian Pathianni zan khan Ukraine 3-0 in an hneh lo. Ukraine sorkarin Kosovo ram zalenna an la pawmpui theih loh avangin Ukraine leh Kosovo te hi Poland-ah an inkhel. Ukraine-in match nga chhung chak hmel an hmuh tawh loh hnuah Andriy Yarmolenko, Artem Kravets leh Ruslan Rotan te goal hmangin hnehna an chang.
Croatia leh Iceland chak : Juventus tan tun season-ah Mario Mandzukic-a'n goal khung harsat mah se an ram Croatia tan goal a khung zel. Bayern Munich striker hlui hian Finland lakah goal awmchhun a khung a, Kosovo an sawp ṭumin hattrick a siam bawk.
Euro 2016-a England pet chhuaktu Iceland-in Turkish defender Omer Toprak own goal leh Alfred Finnbogason goal hmangin Turkey 2-0 in an hneh. Iceland hian European Championship-a an chetṭhat kha an la chhunzawm zel a, qualifier match hmasa bera Ukraine an draw hnuah Finland leh Turkey an hneh.
Pique chawl dawn : Barcelona defender Gerard Pique chuan Pathianni zan khan 2018 World Cup zawhah ram tana inkhelh chawlhsan a tum thu a puang. Kum 29-a upa Pique hian Albania an khelh ṭumin jersey ban tlawn a ha a, Catalan tlangval jersey hakah hian Spain flag rawng anga ṭialna a awm ve lo. Hei vang hian chanchin ngah ve tak Spanish defender hian nasa taka sawisel a hlawh a, ram tana inkhelh a chawlhsan chhan pakhatah a ngaih theih bawk.
Spain tana 2010 World Cup leh Euro 2012 nomawi chawitu Pique chuan, "Ka chanchin ṭha lo an sawina hi hai der hram hram ka tum ṭhin a, tunah chuan ka tlin ta bik lo. Ka kawr ban tluan an sawisel leh takah chuan ka insum zo ta bik lo a, ram tana inkhelh nuam ka tihna pawh min paih bo sak a ni. Russia rama World Cup khelh zawhah kum 31 la ni dawn chauh mah ila ngun taka ka ngaihtuah hnuin inelna zawhah ram tana khel tawh lo turin thutlukna ka siam," tiin a sawi.
Ramos a inhliam : Spain captain Sergio Ramos chu minute 80-naah a khup hliam vangin lakchhuah a ni a, Manchester City midfielder David Silva-a'n captain armband a hreng zui. Real Madrid defender Ramos hi a khup hliam vang hian thla khat chhung vel chawl tura ngaih a ni a, Zinedine Zidane hoten match li chhung an khingpuite an draw tawh avangin player pawimawh inhliam hi pawi an ti khawp ang.