Anfield: Liverpool tana vanram tlafual chu!
Europe-a stadium ropui sawi a nih apiangin Anfield sawi hmaih a ni ngai lo a, English club hlawhtling ber pawl Liverpool khelmual hi a stadium mawina leh changkanna ai mah chuan stadium chhunga fan-te boruak vanga hriat hlawh a ni.
Anfield hi tun hnaiah mipui 8,500 lenna tura zauh belh a ni a, Reds khelmualah hian mipui 54,074 leng tawhin stadium len lamah England-ah parukna a ni. Tun season ṭantirha stadium an tih len takah chuan tun hma zawng aiin fan-te boruak a ṭha lehzual dawn tihna a ni.
Dutch legend Johan Cruyff khan Ajax leh Barcelona tan a khelh laiin Anfield hi a lo tlawh tawh a, Liverpool khelmual boruak ropui zia a hrechiang hle. Cruyff chuan, "You'll never walk alone tih anga hla ropui nei club hi Europe-ah an awm lo a, khawvelah Liverpool leh fan-te inpawhna ang nei club hi pakhatmah an awm lo. Kop ho kha ka thlir reng a, ka thisen zungzam zawng zawng hi an fan chhuak vek ni mai hian ka hria. Mipui 40,000 vel pungkhawm kha an club tan chakna thahrui an ni a, hetiang hi khawvel hmun dangah a tam loh avangin Liverpool hi thil dang zawng aiin ka ngainat phah a ni," tiin a lo sawi tawh.
Anfield chanchin
Anfield hi tun hma chuan Everton khelmual a ni ṭhin a, a neitu dik tak chu John Orrell a ni. Everton F.C. member zingah Orrell-a ṭhianpa John Houlding a tel a, Orrell hian a ṭhianpa telna club hi kum 1884 khan a ram hi a hawhtir.
Kum 1892 khan Everton chuan khelmual neitu nihna neih tumin Orrell an dawr a, he khelmual an hawh theih chhan club member zinga mi Houlding leh Everton hotute thu a inhmuh theih loh avangin Everton hian Anfield hi lei loin tuna an khelmual Goodison Park lamah an insawn.
Sumdawng hausa Houl-ding-a lungawi loin Anfield luah tur club thar a din a, a hming chu Liverpool F.C. and Athletic Grounds Ltd. tih a ni. Reds hian Anfield-a an match hmasa ber chu
September 1, 1892 khan khelin friendly match-ah Rotherham Town chu 7-1 in an sawp. An league match hmasa ber chu September 9, 1893 khan khelin Lincoln City 4-0 in an hneh.
Anfield ropuina
Arsenal legend Thierry Henry chuan, "Liverpool fan-te hi fak phu khawpin an ropui a ni. Khualmuala ka inkhelha boruak danglam ka tem ṭhinna chu Anfield a ni a, fan-ten 'You'll never walk alone' tih an sak lai phei chuan ka mur sung sung thei a ni," tiin Gunners tih loha a khelh châkna ber club-a a sawi Liverpool chungchang a sawi.
Juventus coach-a nih lai khan Fabio Capello-a'n kum 2005 Champions League-ah Anfield tlawhin a tlawm a, "Anfield ang khelmualah chuan tawnhriat ngah player tan pawh phur luatah chetsual theih a ni a, an fan-ten an ṭawiawmna zawng zawng nen Anfield-a Liverpool dan tum chu thil theih loh ang mai a ni," a ti.
Chelsea captain John Terry chuan, "Liverpool fan-te hi chu an danglam bik a ni. Anfield stadium anga boruak ropui hi ka la tem ngai lo a, ka tem leh pawh ka ring tawh lo. Fan-te an zai lai ngaihthlak phei chuan ka hmul thi hi a ding sung sung thei a ni," tiin Anfield-a inkhelh danglam bikna a sawi.
Reds player
Liverpool striker hlui Fernando Morientes chuan, "Anfield-a Champions League khelh kha ka hun tawn tawh zinga ropui ber a ni. Ka pa hnenah he thu hi ka hrilh a, ani chuan, 'Mahse, Real Madrid tan pawh i khel tawh alawm,' a lo ti a, ka chhana chu, 'Madrid-a khelh kha a nuam a, mah se Anfield chu el phak rual lohin a danglam a ni. Fan-te hian chak turin nasa takin min pui a ni,' tih hi a ni," tiin a sawi.
Kum 2005 Champions League semifinal-ah Liverpool-in Anfield-ah Chelsea 1-0 in an hneh a, a hunlaia Reds captain Steven Gerrard chuan a hun tawn thlir kirin, "Inkhelh ṭan hma minute 50 velah khan khelmual chu a sukin a su dup dup tawh a, khatiang kha ka la tawng ngai lo. A tawpah kha chuan fan-te nena lam ho vak mai kha ka duh ber a, England hian anni aia fans
ṭha a nei thei lo," a ti.
Player leh coach ropui ten Anfield danglamna an sawi a, karleh Thawhṭanni zanah, "Anfield thiltihtheihna hi ka hria a, a danglam bik a ni," tia lo sawi tawhtu Jose Mourinho hoin Manchester United an lenglut dawn. Anfield ropuinain United a hliahkhuh dawn nge Anfield a ropui zual zel dawn? - a hriat thuai dawn e.