Cruyff faktu Guardiola

Dutch legend Johan Cruyff-a'n ama chanchin a ziahna lehkhabu Johan Cruyff: My Turn chu tun hnaiah tlangzarh a ni a, he hunah hian Manchester City manager Pep Guardiola pawh a tel.

Barcelona-a Johan Cruyff enkawlna hnuaia khel tawh Pep Guardiola chuan, "Barcelona, Bayern Munich leh Manchester City ka enkawl theih chhan chu Johan ka tawn vang kha a ni. Thil tam tak a hnen aṭangin ka zir a, kum 36-a upa a nih pawh khan keini aiin football kha a thiam zawk a ni," a ti.

Pep chuan Cruyff nena an inhrawn lai sawi chhunzawmin, "Cruyff enkawlna hnuaia ka khelh hmasak ber khan a beisei ka phak lo em em a, 'ka pi ai pawn i tlan muang zawk,' tiin min hrilh a, chhan ngaihna ka hre lo. Barcelona tan khel leh tawh lo turah ka inngai a, mah se a hnuah hmun pawimawh ka chang thei. Johan khan theihtawp chhuah turin min nawr reng a, a aia ṭha zawk zel kha a beisei a ni," tiin a pu hlui chungchang a sawi.

Khawvela coach ṭha ber anga an sawi ṭhin Pep chuan, "Khawvela coach ṭha ber chu kei ni loin Cruyff kha a ni a, amah han hnaih phak hi tumah an awm lo. Football khelh dan phung a thlak danglam a, chu chu hlawhtlinpuia mi zawng zawng a zuna uai tir hi thil harsa a ni. Mahse Cruyff chuan kha kha a ti tlat. Barcelona ka enkawl lai pawh khan a thurawn la turin ka tlawh fo a ni," a ti.

John Cruyff-a fapa Manchester United midfielder hlui Jordi Cruyff chuan, "Ka pa kha la dam se chuan Manchester City fan a ni tawh ang. An khelh dan hi a hmuhnawm tih chi a ni," tiin Pep a chawimawi let ve bawk. Johan Cruyff hi March thla khan kum 68-a upa niin cancer natna avangin a thi a ni.