South America World Cup Qualifier Match hnih chak zo lo Argentina tan fiahna

Nilaini zing dar 5:00 hian world champion vawi hnih ni tawh Argentina chuan an rama khelmual hmingthang tak pakhat Estadio Mario Alberto Kempes-ah 2018 World Cup qualifier-a an match 10-na khel turin Paraguay an lo mikhual ang. Dar 6:00-ah Brazil leh Venezuela te an inkhel bawk ang.

Copa America Centenario zawh aṭanga Argentina enkawltu Edgardo Bauza nauten an match hnuhnung pahnihah an thiampuipa Lionel Messi tel loin an khel a, Barcelona star ṭhâl nat chhunga an match pahnihah hian Venezuela leh Peru te chu 2-2 ve vein an inhnehtawk pui - Messi hi a hliam vangin a la chawl mek.

Ram tana goal khung hnem ber Messi tel lo mah se Argentina hian Gonzalo Higuain an la nei a, Juventus hmatawng duhawm Paul Dybala a la awm tel bawk avangin zamna chhan tur a awm lo. Mahse, a zawna match hnih chhung 2-1 a hma an hruai hnua an goal an venhmin zawh loh avangin an tlarhnung an rem uluk a ngai thung ang.

Tun dinhmunah Argentina hi table-a an hnuai chiaha awm Paraguay aiin point liin an sang zawk a, an mikhual tur hi Copa America-ah khan group stage-ah 2-2 a an inhnehtawkpui hnuin semifinal-ah 6-1 in an sawp thei a, tun ṭumah pawh hian chak zawk tura rinkai an ni.

Brazil an tluang

World champion vawi nga ni tawh Brazil hian March 29-a Paraguay 2-2 a an inhnehtawkpui hnuah an match pathumah hnehna an chang vek a, an match hnuhnung bera Bolivia 5-0 a an sawp ṭum phei chuan captain Neymar-a'n ram leh club tana a goal khung belh-khawma goal 300-na a khung.

Brazil hian team 10 awmna South America table-ah point 18 hmuin pahnihna an ni mek a, pakhatna Uruguay nen an inthlauhna chu point khat chiah a nih avangin an dinhmun hi a duhawm rih hle. An khingpui tur Venezuela erawh tun dinhmuna record nei chhe ber an ni thung - match kua an khelh tawh aṭangin chak ni hmel an la hmu lo a, point hnih hmuin table mawngphah luahtu an ni.

Ram pahnihte intawn tawhna tlir kirin Brazil an chungnung hle a, an inhmachhawn hnuhnung vawi 11-ah ṭum khat chiah chak loh an nei, vawi riat hnehna changin vawi hnih an inhnehtawk - goal 33 tehmeuh Venezuela lamah an pet luh laiin goal ruk chiah an chhuah thung.

Harhna mamawh Chile

A zawnin Copa America nomawi chawi thei mah se Chile-in beisei angin Russia pan turin kawng dik an zawh mai thei bik lo. South America ram 10 inelna ṭangin a sang pali chu World Cup khel turin an tling nghal dawn a, pangana chuan inter-confederation playoff an khelh a ngai - tuna Chile dinhmun chu pasarihna a ni. Nilaini zing dar 5:00 hian an hnuai chiaha mi Peru an lo mikhual dawn a, point thum hmuh theihna hun ṭha a ni ang.