Japan-ah Kyrgios a hrang

Australian rawlthar service nei ṭha tak Nick Kyrgios chuan ATP Japan Open final-ah vawi 25 zet ace siamin a khingpui David Goffin chu 4-6, 6-3, 7-5 in a hneh.

Kum 21-a upa Kyrgios hian 220 km/hr (136 mph) zeta na tein a service
ṭhin a, Belgian tlangval Goffin-a'n ṭha takin khel ve bawk mah se a dang zo lo a ni ber a, break point vawi 12 a hmuh aṭanga ṭum 11 zet a inhumhim hnuah darkar hnih chhungin a chak zawkah a ṭang.

World number 15 Kyrgios chuan, "David khan court chhung kha a luah hnehin ka tan inkhelh a harsa em em a, ka service ṭha kha ka vanneih phah hlauh a ni," a ti. Seeded parukna Kyrgios hian kuminah Japan hma hian Marseille leh Atlanta-ah te champion nomawi a lo chawi tawh bawk.

Kum 25-a Goffin chuan, "Set hmasa berah pawh khan a service ṭhat tawh tehlul nen set hnu-hnung pahnihah khan a na zual a, ka tan dan a harsa a ni. Ka theih tawpin ball kha play rei tum mah ila a ball rawn vuak phei lo hlap let kha a harsa hle a, ka chak loh phah," tiin a hneh lo zawk tih a pha lo.