Japan mikhual tur Cahill a phur

Australian attacking midfielder Tim Cahill chuan vawiin chawhnu dar 2:30-a Japan nen an inkhelh tur chu a ngahhleh thu a sawi chhuak.

Asia rama football thiam ram pahnihte hi 2018 FIFA World Cup qualifier Group B-ah awm dunin match thum an khelh tawh aṭangin Australia hian point sarih an hmu tawh a, an mikhual tur Japan hian point ruk an hmu tawh thung - vawiin inkhel result a zir hian an dinhmun a inthlakthleng hlawk thei.

Ram tana match 93 khel tawh Cahill chuan, "Saudi Arabia nen kan inhmachhawn ṭumin hun tawp dawnah luhtir ka ni a, danglamna ka siam thei. Japan lakah hian inkhel bul ka ṭan emaw ṭan lo emaw pawh ni se ka buai lo a, a pawimawh ber chu kan ramin point thum kan hmuh theih dan tur a ni zawk," tiin a sawi.

Everton tana goal 68 khung thei Cahill chuan sawi chhunzawmin, "Japan hi team ṭha an ni a, minute 90 chhung chu inthlahdah thei miah loin min siam ngei dawn tih ka chiang. Kan khelmuala inkhel tur kan nih avangin fans an pawimawh a, min
ṭantute Etihad Stadium khat tlata an rawn pun khawm ngei ka beisei," a ti.

Zanin dar 6:00 hian Group A hmahruaitu Iran chuan Tottenham striker Son Heung-Min te ram South Korea an lo mikhual dawn a, tun hnaia football lama thawm nei lian China leh Uzbekistan te dar 6:30-ah an inhmachhawn bawk ang.