Nigeria tan Iheanacho leh Iwobi

Africa khawmualpui World Cup qualifier-ah Nigeria chuan Zambia lakah 2-1 a hnehna changin bul an ṭan a, Nigeria goal hnih hi Premier League rawlthar duhawm pahnih khung a ni. Minute 32-naah Arsenal forward Alex Iwobi chuan Super Eagles goal hmahruai hi a khung a, Manchester City striker Kelechi Iheanacho chuan goal luh aṭanga minute 10 hnuah goal khat dangin a chhunzawm ve leh a ni.

Group B-a inkhel dangah Algeria-in Leicester City forward pahnih Riyad Mahrez leh Islam Slimani nei mah se Cameroon lakah hnehna an chang zo lo a, 1-1 in an inhnehtawk. Algeria tana El Arabi Soudani goal hmahruai chu Cameroon-in Benjamin Moukandjo hmangin an chhang let.

Zirtawpnia Ghana leh Uganda te goal awm loa an inhnehtawk hnuah Egypt chuan Group E hmahruaitu ni turin Congo chu 2-1 in an hneh a, Group A inkhelah Tunisia chuan 2-0 in Guinea an hneh bawk.