Konta hnehtu Radwanska a champion

Pathiannia khelh zawh tak China Open-ah Agnieszka Radwanska chuan Johanna Konta hnehin champion nomawi a chawi.

Seeded pathumna Ra-dwans-ka hian Beijing-ah hian set a hloh miah lo a, final-ah pawh hian Britain nula chhuanvawr lakah hian darkar khat leh minute 36 chhungin 6-4, 6-2 in hnehna a chang. Polish nula hi China-ah hian vawi hnih a champion-na niin tennis a khelh hun chhungin WTA title 20 a la tling ta chiah bawk.

Kum 27-a upa Radwanska chuan, "Beijing-ah final vawi thum ka khel a, ṭum hnih ka champion ta. Ka tan chuan he hmun hi a nuamin a hlu a, ka theihnghilh tawh lo ang. Tennis player ropui tak te huanga ka hming a chuang ve hi ka lawm," a ti.

Hmeichhe tennis khel lai zingah Radwanska hian Serena Williams, Maria Sha-rapova leh Victoria Azarenka te chiah nomawi chawi tam lamah tluk loh a nei.

Kum 25-a upa Konta hian nomawi chawi lo mah se a thlen chin hi a tan lawmna tham a tling. Tun kara WTA ranking chhuak thar berah chuan Konta hi a sang zual 10 zingah a tel tawh dawn. Kum 1984 khan Jo Durie chu top ten-ah a lo lang tawh a, ani tih lohah chuan Konta hi Britain hmeichhe zinga hetiang dinhmun luah leh thei hmasa ber a ni.