Kerala leh Delhi inhnehtawk

Pathianni zan khan Kerala Blasters chuan Delhi Dynamos an mikhual a, team pahnih hi goal khung loin an inhnehtawk. Kerala-in vawi thum inkhel an hmachhawn tawhah hnehna an la chang lo a, Delhi an draw hma hian an match hmasa pahnihah a tlawm zawkah an lo ṭang tawh. Gianluca Zambrotta enkawl Delhi tan erawh an match hnih khelhna a ni a, tlawm hmel an la hmu lo.

Jawaharlal Nehru Stadium-a fans 55,000 pungkhawm hmaah Kerala Blasters tana hun ṭha ber chu Michael Chopra-a'n a khawhral a, Newcastle United striker hlui hian Spanish midfielder Josu hnen aṭanga a ball hmuh ṭha tak chu goal-ah a chantir thei lo. Delhi Dynamos tan Badara Badji leh Marcelinho ten an hun ṭha neih an khawhral bawk.

Delhi Dynamos coach Gianluca Zambrotta chuan, "Game tinah kan kalphung kan thlak a ngai a, zaninah khan goal khung lo mah ila kan khel ṭha takzet a ni," tiin a naute khelh danah a lawm. Player-a nih laia Italy tana vawi 98 inlan thei defender hian Mizo tlangval Lalchhawnkima chu a vawi hnih nan inkhel bul a ṭantir a, Kim Kima nena Aizawl FC-a khel dun ṭhin Lalruatthara erawh bench lamah hun hmantir a ni thung.