Zaninah England leh Southgate tan fiahna

England manager lailawk Gareth Southgate-a'n an ram team a kaihhruai hmasak berah Malta mikhualin 2-0 in hnehna chang mah se FIFA ranking-a 176-na team hneh hi phulpui hlut tham a ni lo. Zanin dar 12:15-ah Southgate-a leh a nauten Slovenia an lenchilh dawn a, Middlesbrough boss hlui hnuaia England tan fiahna tak tak inṭan zan a ni.

Rooney dinhmun

Malta an hneh zawh hnu lawkah England fans ṭhenkhatin Wayne Rooney an au el a, tun season-a Manchester United tan match 10 a inlana goal khat chiah khungtu striker hi England kawr ha tlak tawh loah an ngai.

Southgate-a'n Malta lakah Rooney hi midfielder angin a chhawr a, Rooney-a khelhnaa khel turin khel thiam sa Tottenham Hotspur midfielder Eric Dier-a awm. Hetiang boruak karah hian England boss chuan captain Rooney chu Slovenia lakah bul a ṭantir loh mai theih thu a sawi chhuak.

Boro manager hlui chuan, "Team tana ṭha ber turin thutlukna ka siam a ṭul a, chumi tur chuan player ṭhenkhat chu bench-ah dah an ngai ṭhin. Player hming langsar sa thlan ngawt theih a ni lo a, hei hi kan hna pawimawh tak pakhat a ni," tiin Slovenia hmachhawn tur squad-ah tumah khel chiang sa an awm loh thu a sawi.

Ram tana inpe

Southgate chuan Rooney-a'n Spetember 18 hnuah Pre-mier League inkhel bul ṭan leh tawh lo mah se ram tana inpe tak a nih avanga ko a nih thu a sawi lang nghal.

Kum 46-a upa manager chuan, "Premier League player zinga 30% chiah hi English player an ni. Chung zinga
ṭhenkhat chuan England tana khelh an duh lo a, ṭhenkhat chu ram tana khel tur khawpin an ṭha tawk lo bawk. Chutiang karah chuan he ram captain a nih vanga inchhuang em em, khelmual pawn leh chhung lama player-te kaihruai thiam a awm a, ani koh loh chu thil atthlak a ni ang," tiin Slovenia laka bul ṭan lo mai thei anga a sawi a captain chu a chhan chhunzawm.

Player a nih laia England tana vawi 57 inlan tawh Southgate chuan Slovenia nena an inkhel tur thlir nghalin, "Slovenia hi Malta nen chuan a in ang dawn lo. Khualmualah team dang daih kan hmachhawn dawn a, he team tana ṭha ber tur kan ngaihtuah a ngai. An game plan tibuai thei tur player ka thlan chhuah a ngai dawn a ni," a ti.

Rooney hlau rawh u!

English media ten Rooney an sawisel karah an hmachhawn tur Slovenia goalkeeper Jan Oblak chuan Everton chhuak striker chu English player zinga hlauhawm ber tur a nih thu a sawi! Atletico Madrid keeper chuan, "Rooney hi khawvel huap a hriat khawpa player thiam leh lar a ni a ni a, England match tinah a pawimawh zia kan hmu ṭhin. Player pawimawh danchah kan tum a nih chuan Rooney hi kan ven hmasak tur chu a ni," tiin October 24-a kum 31 tling mai tur striker chungchang a sawi.

Kum 23-a upa keeper chuan England nena an inkhel tur thlirlawkin, "England player zingah hlauh pakhatmah ka nei lo a, tlarhma lama player an neih ṭhat zia pawh hrilh ngai loin ka hria. Mahse, danchah kan tum dawn a ni. World Cup 2018 hi khelh kan duh tak tak chuan England laka hnehna chan hi kan tan a pawimawh a, khelmuala an talbuai theihna turin theihtawp kan chhuah a ngai a ni," a ti. Slovenia hian an match hmasa berah rin loh takin Lithuania chu 2-2 in an draw a, Slovakia lakah 1-0 in hnehna an chang thung.

Player thar

Burnley goalkeeper Tom Heaton chuan hliam tenau a neih avangin Slovenia a hmachhawn thei dawn lo a, kum 30-a upa keeper aiawh tur hian Sunderland keeper Jordan Pickford chu a vawi khat nan ram tana khel tura koh a ni. Arsenal left back Kieran Gibbs chuan Malta laka inhliam Ryan Bertrand hmunruak a luah bawk.

Slovenia lakah player pa-hnih hian inkhel bul an ṭan kher erawh a beiseiawm lo. England leh Slovenia hi match li an lo intawng tawh a, Three Lions (England sawina) hian hnehna an la chang vek. June 2015 kha team pahnih intawn hnuhnung ber a ni a, Jack Wilshere chuan goal hnih a khung.

England hian Slovenia lakah goal kua an khung tawh a, Jermain Defoe, Wayne Rooney, Danny Welbeck, leh Wilshere ten goal hnih ṭheuh khungin Frank Lampard-a'n goal khat a thawh ve bawk. Slovenia hian an khelmuala qualifying match an khelh hnuhnung pakuaah vawi khat chiah tlawm hmel hmuin vawi ruk an chak a, England tan an sulhnu thlira awlsam taka chak tum ngawt a fuh lo ang.