Ibra a thawkrim

Zlatan Ibrahimovic-a'n ram tana inkhelh a chawlhsan tawh avangin in-ternational football khelh laiin hahdamna hun ṭha a nei a, amaherawhchu Man United striker hian a hun awl neih chu a taksa sawizawi nan a hmang.

Kum 35-a upa Ibra chuan Istagram-ah a insawi zawi zo thlalak tar chhuakin, "Hun awl a awm lo. Thawhrimna leh thil tum tih hlawhtlin duhna a awm thung," tiin a thlalak hnuaiah a ziak.

Paris St Germain striker hlui Ibra hian Euro 2016-a Sweden-in Belgium 1-0 a an hneh loh ṭumin ram tana a match hnuhnung ber a khel a, club lamah erawh a kum upatna a lang lo. Season liam ta khan PSG tan match 56 zetah a inlan a, tun season-ah Zlatan hian United tana vawi 11 inlanah goal ruk a khung.

Manchester United-in October 17, Thawhṭanni zan dar 12:30-ah Liverpool hmachhawn turin Anfield an tlawh dawn a, Zlatan Ibrahimovic hian Jose Mourinho game plan-ah hmun pawimawh a chang leh ang.

United striker Zlatan hi AS Roma defender Kostas Manolas chuan a player hmachhawn tawha ven harsa ber a nih thu a sawi a. Greek defender hian Luis Suarez (Barcelona), Karim Benzema (Real Madrid), Cristiano Ronaldo (Real Madrid) leh Lionel Messi (Barcelona) aiin Swede striker hi a dah sang zawk.