Henry ngaisangtu Willian

Chelsea star Willian chuan Arsenal legend Thierry Henry chu a 'idol' a nih thu leh a goal khungte chu midang khung aia mawi a tih bik thu a sawi chhuak.

France international hlui Henry hian Arsene Wenger-a kaihhruaina hnuaiah Premier League-ah goal 175 a khung a, Gunners hi league no-mawi pahnih bakah FA Cup vawi thum champion puiin an club chanchina goal khung hnem ber a ni a. English mi ni loah chuan Premier League-a goal khung hnem ber a ni.

Brazil international Willian chuan, "Ka hmuh dan chuan ani (Henry) kha Premier League player zinga a ṭha berte zinga mi a ni. A khelh dan phung kha ka duh a, goal tam tak a khung theih bakah goal mawi bik a khung thiam," tiin North London club hranghlui a ngaihsan thu a sawi.

Henry hi Wenger-a team din ropui The Invin-cibles zinga mi kha a ni a, tlarhmaah Dennis Bergkamp nen an inkawp ṭhin. Tlarhnungah Sol Campbell leh Kolo Toure te awmin Patrick Vieira leh Robert Pires te chu inkhel khaikhawmtu an ni bawk. Kum 2003 May thla leh 2004 October thla inkar khan match 49 chhung hneh loh nei loin an kaltluang.

Kum 28-a upa Willian hi Corinthians, Shakhtar Donetsk leh Anzhi Ma-khachkala tana a khelh hnuah kum 2013 khan Chelsea a zawm a, match 102 khelh sak tawhin goal 13 a khung ve tawh. London club tan hian Premier League pakhat leh League Cup nomawi pakhat a chawi tawh a ni.