Messi dahsangtu Gomes

Nipui transfer bazar-a Valencia aṭanga Barcelona zawmtu midfielder Andre Gomes chuan Lionel Messi chu player danglam bik a nih thu leh a thiamna chu sawifiah theih pawh a nih loh thu a sawi! Portugal international Gomes chuan, "Mi zawng zawngin Messi ṭhat zia hi chu an hria a ni. Game tinah hian hrilhfiah thiam loh thil mak danglam a ti fo ṭhin. Training lamah chuan 'show' pakhat kan chhim hi a ni ringawt ṭhin, nitin hian ball khawih dan thar hi a rawn hmu chhuak ziah a ni," a ti. Gomes chuan sawi chhunzawmin, "Nitin training kan neih ho vang maiin ngaia neih theih turah ṭhenkhat chuan an ngai mai thei a, mah se nitin ball chawh kual dan thar a hriat reng chuan ngaiah a neih theih loh," tiin Catalan club tana a khelhpui chu a dahsang hle. Kum 23-a upa midfielder hian ram tan Cristiano Ronaldo a khelhpui bawk a, player ṭha zawk chungchangah engmah a sawi duh lo. Gomes chuan, "Ka ngaihdanah chuan player in ang lo an ni a, tun hnaia khawvela footballer ṭha ber pahnih an ni. Player ṭha zawk chungchangah sawi tur ka nei lo a, tun dinhmuna Messi leh Cristiano khelhpui ve ve thei player awmchhun ka ni hi ka inchhuang em em a ni," tiin a sawi.