China-ah Murray a chungnung ber

Andy Murray chuan kumina a title pangana leh tennis a khelh hun chhunga a nomawi 40-na chawi turin Pathianni zan khan Grigor Dimitrov chu China Open final-ah 6-4, 7-6 (7-2) in a hneh.

Beijing-ah hian tun hmain Murray hi a la hlawhtling ngai lo a, a vawi khat nana nomawi chawi turin kuminah erawh seeded pakhatna ni chungin a khel ṭha hle thung - match nga a khelhah set khat mah a hloh lo.

World number 2 Murray chuan, "Grigor khan a tawp thlenga huaisen taka min beih let avangin inkhel awlsam tak a ni lo. Ka tan chuan kumin hi kum
ṭha tak a ni a, ka khelh ṭhat tluan ber kum a ni hial. China-a ka hun hman tawhah chuan a nuam ka tih leh hlim ni ber niin tunah chuan beiseina nen Shanghai lam ka hawi leh rih ang," tiin a sawi.

Kum 25-a upa Dimitrov chuan, "Tun hma zawng aiin Andy khan a khel ṭha zawk a, kumin hi a tan kum ṭha bik a ni. Semifinal-ah inkhelh hah ngai loin tlang mah ila nomawi chawi tur erawh chuan kei aiin a ṭha zawk," tiin a hneh loh player a chawimawi thiam hle. Murray leh Dimitrov te hi vawi 11 an inhmachhawn tawh a, heng zinga vawi riatah Murray-a'n hnehna a chang.

Murray tan kum ṭha

Kum 29-a upa Murray hi kuminah a vawi hnih nan Wim-bledon-ah a champion a, hei bakah hian ATP World Tour Masters 1000 event lamah Rome leh Aegon Championships-ah te champion-in Rio Olympics-ah gold medal a dawng bawk. China Open khelh ṭan hmaa a sawi ang ngeiin Novak Djokovic nena an inthlauhna a ti zim zel.

Tun dinhmunah Murray hi ATP ranking-ah number 2 a ni mek a, pakhatna Djokovic nen an inthlauhna chu point 4695 a ni. Britain tlangval hian point 500 a hmuh belh leh tak avangin an inkar zau lutuk a ti zim hret.

Serbian tlangval Djokovic hi hliam vangin a chawl mek a, hei tak hi Murray tan dinhmun insiamṭhatna hun a ni. Kuminah Barclays ATP World Tour Finals khelh hmain ATP World Tour Masters 1000 events zinga pahnih Shanghai leh Paris Masters khelh tur an la nei a, hengah te hian Britain tennis star Murray-a'n tuna a hlawhtlinna hi a chhunzawm thei a nih chuan tun hma aṭanga a lo suangtuah ṭhin number 1 ni thei turin beiseina a nei zel ang.

Hetihlai hian kum 29-a upa Djokovic hi a kiu na vangin China Open-ah khan a inlan thei lo thung. Grand Slam vawi 12 champion tawh hian duhthusama
ṭhain season bul a ṭan a, Australian leh French Open-ah te Murray hnehin a champion.

Mahse, season laihawl aṭang-in Djokovic hian beisei a phak lo a, Wimbledon third round-ah chak loin US Open final-ah Stan Wawrinka a hneh lo bawk a; Rio Olympic-a a match hmasa berah a chak lo bawk. ATP ranking-a a dinhmun sawhnghet tur leh nomawi chawi tam lama a elpui Roger Federer leh Rafael Nadal te nomawi chawi zat um turin tunkar chhunga khelh tur Shanghai Mesters-ah a lo kir dawn.