Hopman Cup-a inlan tur Federer

Grand Slam vawi 17 champion tawh Roger Federer chuan a taksain chawlh a mamawh vangin US Open khelh hma khan kumin atana inelna a hmachhawn tawh loh tur thu a sawi tawh a, Swiss thiampuipa hian season thar bul ṭan nan January thla a khelh tur Hopman Cup-ah inlan a tum.

Australian Open inbuatsaih nana an hman ṭhin Hopman Cup-ah hian ram hrang hrang pasarih aṭangin team pariat an inel ṭhin, inelna thlengtu Australia-in team hnih an nei. Team pakhatah hian mipa leh hmeichhia awm zelin Swiss tan hian Federer leh Belinda Bencic an inkawp ang.

Nikum khan Australia (team 2), Czech Republic, France, Germany, Britain, Ukraine leh United States aṭang teiin an inlan. Khawtual player Nick Kyrgios leh Daria Gavrilova te an champion a, kum 1999-a Mark Philippoussis leh Jelena Dokic te an champion hnua Australian star hlawhtling leh thei hmasa ber an ni.