Fury kawnghren hlihsak mai thei

British world heavy-weight champion Tyson Fury chu World Boxing Organisation chuan an pawl chairman zawhna ni 10 chhunga a chhang lo a nih chuan a champion kawnghren an hlihsak tur thu an sawi.

WBO chuan kum 28-a upa boxer hi an contract a zawm loh vang te, damdawi hman phal loh a hman vang tea insawifiah turin an phut a, a title kawl lai an hlihsak loh nachhan tur chhan ṭha tak pe turin an phut a ni.

November, 2015-a Wladimir Klitschko a hneh hnu khan Fury hi contract awmsa angin Ukrainian boxer nen hian inhmachhawn leh tura tih an ni a, June thlaa hliam vanga a inhnuhdawh hnuin kumin October-ah khan inhnek tura ruahmanna siam vek a nih hnuah a rilru lam buaina avanga inhnukdawk lehin Rolling Stone magazine-in an kawmnaah a rilru buaina chhawk nan cocaine a hman thu a inpuang.

Vawiina inhmukhawm tur British Boxing Board of Control chuan WBO leh WBA title kawltu Fury chungchang hi an ngaihtuah dawn a, British boxer hi he thuziak i chhiar meuh chuan a champion kawnghren hi hlihsak a ni tawh hial mai thei.

WBO chairman Luis Batista-Salas chuan Fury hriselna dinhmun chuan a rilru a tihbuai thu a sawi a, WBA president Gilberto Mendoza chuan Fury chu a kawnghren hlih sak a nih hmaa a rilru buaina te a tlansan theih nan hun ṭha pek phawt a pawimawh thu a sawi thung.