Mei sâ tawn dai thei Turia Pitt

"I dam chhungin i tlan leh tawh ngai lo ang," tiin amah enkawltu doctor-in a hrilh lai khan beidawngin indawm kun ngat se chuan Turia Pitt-i hi tu nge a nih khawvelin a hre lo ang. Australian runner hi thih hlauhthawnawm khawpin kang (fire) tawh mah se a beidawng lo a, natna a tawh aṭanga kum nga hnuah Ironman World Championship-ah inlanin a tawp a thleng leh thei hial!

Kum 2011 khan Pitt hi Wes-tern Australia, Kimberley-a ultramarathon-ah a inlan. Vanduai thlak takin he hunah hian a kâng hlauh a, a taksa 65% chu mei kangin a man. Hei vang hian ni 864 chhung zet damdawi-inah dah a ni a, vawi 200 tehmeuh zai a ni. A kut zungṭang
veilam pali a chan a, dinglam zungpui a hloh bawk - amah enkawltuin a intlansiak tawh loh tur thu a hrilh hi thil mak a ni lo.

Mahse, Pathianni a neih zawh tak Hawaii Ironman-ah khan Pitt hi a inlan a, a tawp a thleng thei leh ta. Hawaii Ironman-ah khan 3.8 km a thui tui an hleuh a, 180 km
a thui chu cycle a tlanin 42 km zet a thui kein an tlan bawk - heng zawng zawng hlen chhuak tur hian Pitt hian darkar 14, minute 37 leh second 30 chiah hun a hmang! Infiammi 2000 chuang inelnaah a chak ber ni lo mah se mite mit fukna leh ngaihven ber pakhat a ni chiang hle.

Inelna an neih hma hian Pitt chuan, "A pawimawh berah chuan ka thil tih turah ka rilru zawng zawng ka hmang tur a ni. Keimah ngei hi infuihin huaisen turin ka inti paukhauh ṭhin. 'Nula dam ṭha i ni, tun hmaa natna i lo tawn tawh ai khan tuna inelna i hmachhawn tur hi a hautak lo zawk,' tiin ka infuih mawh mawlh ṭhin," tiin a lo sawi lawk tawh a, a tumruhna leh huaisenna hi fak tlak a ni.

Ironman World Champion-ship hi kum 1978 aṭang khan kum tinin Hawaii-ah neih ṭhin a ni a, 1978 aṭang khan hmun dangah huang zauh niin ram dangah pawh inelna hi neih
ṭhin a ni. Kum 1997 aṭang khan piangphunga rualbanlote inelna hi telh niin Australian tlangval John Maclean chu champion thei hmasa ber a ni a. Rualbanlote tan inelna hi darkar 17 chhunga zawh hman tur a ni a, Pitt hian darkar hnih leh a chanve zet zawtin hun tiam zawh hmain a thleng tihna a ni.

Kum 29-a upa Pitt chuan, "Ka taksa nasa taka a kân tawh avangin khaw lum tuar a har hle a, min vawng dai thei tur thil ka ei a, ka in a ngai ṭhin. Thuamhnaw var ka hak chhan pawh rawng dang aia min ti dai theitu zawk a nih vang a ni," tiin a sawi.

Kumin May thla khan Pitt hian a hliam a dam tawh a ni tih lantirin 226 km zeta thui intlansiakna Ironman Australia Triathlon-ah a lo inlan tawh bawk a, hemi ṭum pawh hian khawvel thuthar thehdarhtute chaw tui ber pakhat a lo ni tawh.

Pitt chuan sawi chhun-zawmin, "Ironman inelnaa tel tur chuan engkim hi tih theih loh a awm lo tih hi rilrua kan vawn reng a ngai," a ti. Pitt hi social media lamah mi tam takin an ngaihven zui a, mi tum ruh, harsatna leh buaina pawhin a hneh zawh loh entawn tlak a nih zia mi tam takin an tarlang.

Lunglawm a kim

Hmangaihna dik chuan mi a phatsan ngai lo tih tidik turin Pitt hian a taksa hmelmawina chan vek tawh mah se hun rei tak a lo zui tawh Michael Hoskin chuan a kalsan chuang lo. A taksa 65% zet a chhiat hnu July 21, 2015 khan an inhual. Hawaii Ironman-ah pawh hian a pasal hual Hoskin hian a ṭawiawm zel a ni.

Pitt hi a taksa a kan chhiat khan kum 24 chauha upa a la ni a, vanduaina a tawh hma hi chuan model niin a taksa a vawng ṭha thei hle a, thiamna lamah pawh mining engineer a ni bawk. A vanduaina vangin a hringnun her danglamin awm mah se a rilru leh theihna a danglam ve loh avangin khawvelin mi beidawngte tana entawn tlak a sawi apiangin a hming hi lamrik a ni ve ṭhin ngei ang.