Premier League-ah English player tan hmun a tlem

CIES Football Observatory-in an zirchianna thar bera a lan dan chuan Premier League club ten English player-te khelmual chhungah hun an hman tamtir tawk lo a, European league sang zual dangte nena khaikhin phei chuan anmahni ram mi ngei player chhawr kawngah Premier League club-te an hnufual hle.

Premier League club zingah club pali chiahin tun season-a an match khelh tawh minute-a 50% aia tam English player an chhawr a, Bournemouth chu khawtual player chhawr hnem ber an ni. Eddie Howe-a enkawl team hian minute an khelh tawh zata 81%-ah English player an chhawr a, Burnley (62%), Crystal Palace (53%) leh Everton (52%) ten an dawt.

Club lian zingah Liverpool chu English player-te hun pe tam ber an ni a, an minute khelh tawh zata 37%-ah English player an chhawr. An hnuai chiaha awm Tottenham Hotspur-in minute an khelh tawh aṭanga 28% chu English player chhawr nan an hmang a, Manchester United (26%), Arsenal (23%), Man City (17%) leh Chelsea (16%) te pawhin English player an chhawr tlem hle.

Premier League club zingah Watford-in khawtual tlangval an chhawr tlem ber a, Italian manager Walter Mazzarri enkawlna hnuaia khel club hian league match an khelh tawh minute aṭanga 9% chiah English player chhawr nan an hmang a, captain Troy Deeney chiah he club-a English player zingah inkhel bul ṭan ṭhin a awm.

Hmun dangah chuan...

La Liga lamah chuan Spanish club 11-in an minute khelh tawha 50% aia tam Spanish player chhawr nan an hmang a, Ligue 1-in hetianga khawtual player chhawr thei hi club 20-ah 17 an nei a, Bundesliga-in club 18-ah pasarih neiin Serie A-in club pariat an nei thung.

Bournemouth-in an minute hman tawha 81%-ah khawtual player chhawr mah se Europe-a league langsar dang pali nena khaikhin chuan an la chhawr tlem ber tho! Spanish club Osasuna chuan an minute khelh tawha 97%-ah Spanish player chhawrin Europe league sang panga zinga khawtual player chhawr ngun ber an ni.

Pahnihna French club Nancy-in 92% ah khawtual tlangval an chhawr a, Italy lamah chuan 86% chhawrtu Sassuolo chu pakhatna niin German club Freiburg chuan an minute khelh tawha 84%-ah German player an chhawr thung.

Europe club langsar zingah Borussia Dortmund chuan an minute khelha 43%-ah German player an chhawr a, an elpui ber Bayern Munich chuan 34% an chhawr thung. Real Madrid leh Barcelona ten an minute khelh tawh zawng zawnga 41%-ah Spanish player chhawrin an chhawr tam dan a in ang a, Atletico Madrid chuan 36%-ah an chhawr thung.

Paris Saint Germain-in an minute 35% ah French player an chhawr a, Juventus-in 32% ah Italian player chhawrin Napoli-a Italian player ten 20% an chang ve thung.

Hmanah chuan...

Premier League khelh a nih hmasak ber season 1992/93-a kar hmasa berah khan inkhel bul ṭantu 69% chu khawtual tlangval an ni a, kumina a tlak hniamna hi 34% a ni. Chumi awmzia chu tun season Premier League match club tinin an khelh hmasak bera player 220 inkhel bul ṭan zinga 75 chiah kha English player an ni tihna a ni.

Season hman zawh takah khan Premier League player zinga khawtual tlangval 31% chiahin inkhel bul an ṭan ziah. Tun ang renga a kal chuan English Premier League hi khawvela league en hlawh ber ni reng mah se khawtual player-in an tuar zel dawn tihna a ni a, England tan tournament lian thama champion beiseina a tlem hle.

FA thukhawchang

Football Association chair-man Greg Clarke chuan club neitute dinhmun a hriatthiam thu sawiin, "Premier League club neitu ni ila chuan league-a ka hlawhtlin theihna turin inkhel bul ṭan tur 11 ka neih ṭhat ber ka rem zel ang. Mahse, FA hotupa ka nihna angin kei chuan English player tam zawk hmuh ka duh a, club-te hi dem ngawt theih an ni lo," a ti.

Greg Clarke chuan sawi chhunzawmin, "Chuvangin tuna kan buaina tur nia lang chu engtinnge English player tam zawkin club-ah hmun an chan ang a, khawtual tlangval tam zawk chhawr chunga club-ten hlawhtlinna an chhar theih ang tih hi a ni. 'In ti dik lo a ni' tia inzilhhau hun a ni lo a, tu tan pawha kan ṭhat tlan vekna tur ngaihtuah hun a ni zawk," tiin a sawi.