Tiger Woods a inhnukdawk

Hun rei tak hliam vanga a chawlh hnua dam hlim American golfer Tiger Woods chuan tun kar chhunga khelh tur Safeway Open-ah a inlan tur thu lo sawi tawh mah se a inhnukdawk leh hnuhnawh.

Major tournament-a vawi 14 zet champion tawh Woods hi inelnaa a inlan hnuhnung ber chu August 2015 daih tawh kha a ni a, hemi hnu hian ṭum hnih ngawt a hnungzâng zai a ni tawh. Safeway Open-a a inlan loh chhan tur hi inhliam leh palh theihna hmun nia a hriat vang a ni.

World number 1 hlui Woods hi a inkhelh loh rei tawh em avangin tunah chuan world number 786-ah a tla hniam tawh a, December thla a khelh tur Hero World Challenge-ah chuan inlan theih ngei a tum thu a sawi.

Kum 40-a upa Woods chuan, "Ka hriselna a ṭha a, ka taksa a chak ṭha bawk. Mahse, he inelna neihna tur hmun hi chetsual theihna a ni a, fimkhur thu hlaah ka tan chawlh a la ṭha zawk," tiin a sawi.

Woods hi hliam vang-in 2015-16 season chhung zawng kha a inkhel thei lo a, kum 2014 pawh khan inelna 11-ah chauh a inlan.