Mertesacker ngaisangtu Ozil

Mesut Ozil chuan Arsenal captain Per Mertesacker chu player entawn tlak leh ngaihsanawm a nih thu bakah a lak aṭangin thil tam tak a zir chhuah thu a sawi.

Kum 27-a upa Ozil chuan, "Per hi ka hriatna a rei tawh a, hun harsa leh hrehawm tam tak pawh kan paltlang dun tawh. Ani chungchangah hi chuan thil ṭha lo lam sawi tur ka nei lo, team tana ṭha ber tur a ngaihtuah ṭhin a, a mimal lansarhna tur ai chuan kan zavaia ṭhatna tur a ngai pawimawh hmasa ṭhin," a ti.

Arsenal playermaker Ozil leh Mertesacker te hi tun hmain Werder Bremen-ah an lo khel dun tawh a, Germany tan pawh vawi tam tak an inlan dun tawh bawk. Tun hnaiah Per hi a club hlui Werder Bremen chuan lak let an duh niin an sawi a, hei bakah hian Bundesliga club dang Hannover chuan an ngaihven nia sawi a awm bawk.

Ozil chuan sawi chhunzawmin, "Dam ṭha leh thuai turin duhsakna ka hlan a, khelmual chhunga a awm ve ringawt hian player naupang zawk tan phei chuan a thlamuan thlak hle. He hmunah hian kan khelh dun zel ka beisei," tiin a sawi.

Kum 32-a upa Mertesacker hi tun season-ah hliam vangin Arsenal tan a la inlan miah lo. Gunners tlarhnungah Laurent Koscielny leh Shkodran Mustafi te an inkawp fuh tak em avangin dam leh pawh ni se hmun nghet chang tura a beih ngawrh a ngai hle ang.