France leh Netherlands danglamna Pogba
Khawvel footballer manto ber Paul Pogba chuan France leh Netherlands te 2018 FIFA World Cup Qualifier-a an inhmachhawn ṭumin goal awmchhun a khung.
Thawhṭanni zana Amster-dam Arena-a inkhel result avangin France chu Group A-ah Bulgaria 3-0 a sawptu Sweden nen point 7 ve ve hmuin hmahruaitu an ni. Netherlands erawh match li khelhah point li hmuin pathumnaah an awm a, Euro 2016-a inlan tawh lo Danny Blind-a hote awmna hi hmun him a ni lo. Vawi hnih inkhelh kuala hmahruaitu hi FIFA World Cup khel turin an tling dawn a, pahnihna ṭheuhin playoff an khel leh bawk ang.
Hei le Pogba chu!
France ram infiamna chan-chinbu lian L'Equipe chuan 'Ca Cest Pogba!' tihin an chanchinbu kawmah an ziak a, chumi awmzia chu 'Hei ngei hi a ni, an sawi Pogba chu' tihna a ni.
Kum 23-a upa Pogba hi Zirtawpnia France-in Bulgaria 4-1 zeta an sawp ṭumin coach Didier Deschamps chuan a khelh dan a sawisel a, Netherlands nen erawh Manchester United midfielder hian goal hmangin coach selna hi a chhang let. Minute 30-naah hian Pogba hian goal-ah kawh zetin a pet a, Dutch goalkeeper Maarten Stekelenburg-a'n hmun himah a nam per zo lo - a goal!
Arsenal defender Laurent Koscielny-a'n field laiah Dutch defender ball pass chu dang chatin Dimitri Payet a pe nghal a, West Ham midfielder ke aṭanga ball chhuak chu Pogba hian changin goal-ah a pet a, Everton goalkeeper Stekelenburg-a'n a hna a thawk tawk loah a ngaih theih. Chutihrualin Stekelenburg hian Atletico Madrid forward Kevin Gameiro bakah second half-a Pogba tauh goal tur a dan sak a, a vawi khat tihfuh tawk lo chu result thlak danglamtu a ni.
Goal hmaah France an hlauh-awm zawk a, Netherlands erawh Belarus an hneh ṭuma goal hnih khungtu winger tlan chak Quincy Promes minute 15-na leka lakchhuah a ṭul avangin an goal nawr a na tawk lo. France player-te pressure pekah midfielder Georginio Wijnaldum a talbuai a, Liverpool midfielder hi darkar khat hnuah malpui hliam vanga lakchhuah a nih avangin Manchester United hmachhawn turin a dinhmun a chiang lo.
Mualneitu tan Mem-phis Depay leh Vincent Janssen ten goal khung theihna tur nei bawk mah se France keeper Hugo Lloris dan theih loh tur khawpin an pet thei lo.
Eng nge an sawi?
France coach Didier Des-champs chuan, "Inkhel pawi-mawh taka kan chak hi a lawm-awm hle a ni. Tunah chuan hma-hruaitu kan ni ta a, a tawp thlengin helai hmun hi kan chhuahsan tawh tur a ni lo. Netherlands laka kan chak dan a lungawi thlak a, anni aiin goal khungna chance kan ngah a ni," tiin chak phu zawk an nih thu a sawi.
Netherlands coach Danny Blind chuan, "Team ṭha tak lakah game ṭha tak kan khel a, point hmuh kan phu a ni. Stekelenburg khan a tisual a, chutihrualin box chhunga handball vangin penalty hmu tur kan ni," tiin chak lo tur bik an nih loh thu a sawi. Tottenham forward Janssen-a ball pet a danna lamah French defender Koscielny kutin ball a fuh a, mualneitu Netherlands hi penalty pek an ni lo.
Inkhel dang
Sweden-in Zlatan Ibrahi-movic nei tawh lo mah se goal khung lamah harsatna an neih phah lo a, Thawhṭanni zan khan Ola Toivonen, Oscar Hiljemark leh Victor Lindeloef te goal hmangin Bulgaria 3-0 in an sawp.Inkhel dangah Belarus-in an mualah player 10-a khel Luxembourg lakah minute 80-naa substitute Pavel Savitskiy goal hmangin hma hruai mah se mikhual team-in minute nga hnua Aurelien Joachim-a freekick hmangin an sut.
Group A hmahruaitu Sweden leh France te hi November 11 zan khian Paris-ah an in-hma-chhawn ang a, ni hnih hnuah Netherlands-in table mawngphaha awm Luxembourg an lenchilh thung ang.