Sharapova a inkhel leh ta

International Tennis Federation-in kum hnih chhung inkhel thei lo tura an hrem hnua a vawi khat nan Maria Sharapova chu court chhugah a inlan leh ta! Thawhṭanni khan Las Vegas-ah World Team Tennis Smash Hits charity-ah a inlan.

ITF hremna hi infiamna lam thu-buai ngaihtuahtu sang ber Court of Arbitration for Sport chuan thla 15 chhung atan a tihtawi sak. Russian star hi 26 April, 2017 khian an hremna a tawp dawn tihna a ni a, vawi hnih a champion tawhna French Open 2017-ah a inlan thei dawn - tuna a inlanna hi chu WTA hnuaia inelna ni loin ṭanpui ngaite ṭanpuina tura sum tuakna mai a la ni.

Elton John AIDS Foundation-in ni khat chhunga atana an buatsaih he inkhelah hian Sharapova hi doubles-ah a inlan a, American Taylor Johnson nena ṭang dunin Martina Navratilova leh Liezel Huber te lakah an chak lo.

Kum 29-a upa Sharapova chuan, "Court chhungah hun rei tak ka lut ta lo a, tunah hian inelna tak tak ni lo mah se ka inkhel leh ta hi nuam ka tiin ka hlim hle," tiin a sawi. Sharapova hian inelna tak tak a hmachhawn leh theih hun tur chu dawhthei leh nghakhlel taka a nghah thu a lo sawi tawh bawk.

Grand Slam vawi nga champion tawh Sharapova hi kumin January thla a khelh zawh tak Australian Open-ah khan meldonium a hmang tih hmuhchhuah a ni a, infiammite tana hman phal loh damdawi a hmang tih hmuhchhuah a nih avangin inelna pangngaia inlan thei lo tura hrem mek a ni.