World Cup leh Euro a dik tawk lo!

Swiss researcher-ten an zirchianna aṭanga a lan danin World Cup leh European Championship group stage-a match khel hmasa zawk te tan last 16 luh chance a sang hle. Zirchianna aṭanga a lan danin hetianga group stage-a match khel hmasa zawkte hian knockout round lut tur hian 17 % in chance an nei sang zawk.

Zirchiannaah hian kum 1996 leh 2014 inkara World Cup leh Euro khelh te an zirchiang a, team ranking, home advantage, seeding leh chawlh hah-damna hun an neih zat, match an neih kar hlat dante chhut vek a a ni.

He zirchianna buat-saihtu University of St Gallen ami Alex Krumer leh Michael Lechner te chuan group stage match zawng zawng chu a ruala khelh vek ni se World Cup leh Euro hi a fair lehzual tur thu an sawi. Tun dinhmunah chuan group stage match hnuhnung ber chauh hi a rualin an khel ṭhin.

Dr. Krumer chuan, "Tournament kalphung hian team ṭhenkhat hlawhtlinnaah nghawng thui tak a nei thei a ni. He zirchiannaah hian ngaihtuah tel ngai zawng zawng deuhthaw chu ngaihtuah vek a nih avangin team zawng zawngin last 16 luhna chance in ang vek an neih theih nan kalphung hi thlak a ngai a ni," a ti.

Krumer chuan sawi chhunzawmin, "Group stage match zawng zawng hi a ruala khelh theih vek ni se a ṭha hle. Hei hian team tin a khai rual ang a, tournament hi tun aiin a dik lehzual thei dawn a ni," tiin a sawi a, FIFA chuan he zirchianna chung-changah hian thuchhuah an la nei lo thung.