November-ah badminton inelna lian

Hrangbana Memorial Mizoram Badminton League season hnihna chu Mizoram Badminton Association (MBA) leh Zonet Cable TV Pvt. Ltd. ṭangdun chuan November 1-11 chhung khian Electric Veng YMA Hall-ah an buatsaih leh dawn. Nimin khan MBA president C. Zorammawia leh Zonet general manager LV Lalthantluanga ten inremna thuthlung hi an ziak.

Nikum khan MBA leh Zonet te hian inelna hi hlawhtling takin an lo buatsaih tawh a, kumin MBL hi team inelna a ni dawn a; category hrang hrang 5 - mens singles (2 Nos), mens doubles, mixed doubles leh 35+ mens doubles hmangtea inelna hi neih a ni ang. Tuikual Veng, Mission Veng leh Saron Veng-te an inlan leh dawn a, team thar pahnih Edenthar Veng leh Champhai an inlan tawh bawk dawn a ni.

MBL atana players lilamna hi October 14 zan dar 8:00 hian Hotel Grand Conference Hall-ah neih a ni dawn a, hemi hunah hian team tin ten registered player aṭangin player 4 bak an lei thei lovang. Heng baka player an mamawh chu mimal in dawrnain a kal dawn a ni. Mizo shuttler bakah hian team tinten an duh chuan state pawn player pakhat an la tel thei bawk.

Ruahman lawk dan ang chuan MBL hi zan kua khelh tur niin, league stage hi zan rukah khelh a ni ang. Semifinal hi zan hnih khelh a nih leh hnuah zan khat awl a ni ang a, November 11-ah final khelh a ni ang - MBL hi Zonet-ah live ṭhin tur a ni.